Laus Dei ex pauli ad galatas epistola

Tu, Jesu Christe, dedisti te ipsum pro nostris peccatis in mortem, ut eriperes nos de præsenti sæculo nequam, secundum Dei Patris, cui est sempiterna gloria, voluntatem.¹

Tanta est, mundi Redemptor, tuæ evangelicæ legis firmitas, certitudo et veritas, ut licet Apostolus aut angelus de cœlo evangelizaret contrarium, anathema habendum esset et falsitas.²

Qui hominibus quærit inaniter complacere, tuus, Christe, non potest servus consistere.³⁴

Tu, Deus, personam non accipis hominis, nec justificas quemquam ex Mosaicæ legis operibus, sed per fidem formatam et Evangelium Salvatoris.⁵

Tibi, Christe, confixus sum cruci:⁶ vivo itaque jam non ego mihi, sed tu in me, conformans me tibi.

Quod autem nunc vivo in carne, in fide tua vivo, Dei Unigenite, qui dilexisti me, et tradidisti temetipsum pro me.

Non sic, Domine, stulti efficiamur, ut quum spiritu cœperimus, carne miserabiliter consummemur.⁷

Tu, Christe, nos redemisti a legis maledicto, factus pro nobis maledictum:⁸ suspensus es in ligno.

Omnes filii tui sumus, Deus Pater, per fidem Jesu Filii tui:⁹ quem, plenitudine temporis adimpleta, in mundum misisti, natum ex Virgine, subditum legi, ut eos qui sub lege erant redimeret, adoptionemque filiorum a te omnis homo susciperet.¹⁰

Tibi, Fili Dei, cum Patre et Spiritu Sancto, omnis honor, virtus et gloria, in interminabili ævo. Amen.

Quoniam adoptivi filii tui sumus, Pater altissime, misisti Spiritum naturalis ac unici Filii tui in corda nostra piissime, qui clamare nos facit, Abba (Pater), ad te.¹¹

Hinc Christianus non est tuus tantummodo servus, sed amicus, filius et heres.

Bonum semper æmulemur in bono, Christe, rex omnium:¹² in quo circumcisio nihil valet, neque præputium; sed fides per dilectionem operans, efficit tibi gratum.¹³¹⁴

Opera carnis iniqua aufer, clementissime Deus, semper a nobis; et fructibus Spiritus Sancti nos imple penitus, caritate, gaudio, patientia, mansuetudine, pace, ac reliquis.

Non esse nos sinas inanis gloriæ cupidos, invicem provocantes ac invidentes;¹⁵¹⁶ sed præoccupatum in quocumque delicto, in spiritu lenitatis simus humiliter instruentes.

Da nobis, Christe, carnem cum vitiis et concupiscentiis crucifigere, aliorum onera pie et caritative portare, nihil nos reputare.¹⁷

Fac nos in spiritu seminare, ut de spiritu vitam æternam metamus: qui enim in carne seminant, de carne corruptionem et condemnationem messuros non dubitamus.

Quum tempus habemus, operemur bonum ad omnes, præcipue ad credentes.¹⁸

Mihi insuper absit gloriari nisi in cruce tua, Jesu Christe, Domine mi: per quem mundus crucifixus sit mihi, et ego illi, adhærendo cruciformiter tibi.

Stigmata tua, Christe, in corpore meo jugiter portem:¹⁹ cui cum Patre et Spiritu Sancto est honor, gloria et majestas in finem. Amen.

Laus Dei ex Pauli ad Ephesios epistola.

BENEDICTUS es, Deus et Pater Domini nostri Jesu Christi, qui in Christo benedixisti nos in omni benedictione spirituali cœlesti.

Elegisti nos in Christo ante constitutionem mundi, ut essemus sancti et immaculati, in caritate perfecti.

Prædestinasti nos in adoptionem filiorum per Jesum Christum in ipsum, secundum voluntatis tuæ propositum, in laudem²⁰ gloriæ tuæ, et gratiæ præconium, in qua gratificasti nos in dilecto Filio tuo, in quo redemptionem habemus ipsius sanguinis pretio.

Tu, Deus, omnia operaris secundum consilium mentis tuæ, ut simus in laudem gloriæ tuæ, Deus æterne.²¹

Credentes signasti nos, Domine, Spiritu Sancto promissionis, qui pignus est nostræ hereditatis cœlestis, in laudem gloriæ Creatoris.

Pater Christi, Deus gloriæ, da nobis spiritum sapientiæ in agnitionem veritatis tuæ, ut efficaciter cognoscamus quæ sit spes vocationis nostræ, et eminentia in electis gratiæ tuæ.

Potentiam tuæ virtutis, Deus Pater, es operatus in Christo, illum resuscitans a sepulcro, constituensque ad dexteram tuam in cœlo.

Supra omnem Principatum, Potestatem, Virtutem et Dominationem, illum sublimasti; et supra omne nomen quod nominatur in sæculo isto atque futuro, hunc elevasti.

Ipsum quoque dedisti caput super omnem Ecclesiam, quæ est corpus ipsius: imo omni ecclesiasticæ atque angelicæ hierarchiæ eum præfecisti, secundum formam assumptæ humanitatis.

Tu, Deus, qui dives es in misericordia, propter nimiam caritatem qua nos dilexisti, quum essemus mortui peccatis, Christo nos convivificasti.

Gratia tua, Christe, sumus salvati per fidem, et non ex nobis:²² donum etenim tuum est; non ex nostris operibus, ne glorietur inaniter aliquis.

Tua, Domine, sumus factura, creati in Christo in operibus bonis, quæ præparasti, o Deus, ut coram te ambulemus in eis.

Tu, Christe, es pax nostra, qui fecisti utraque unum, per crucem interficiens inimicitias in te ipso, tollendo peccatum.

Per te omnes accessum habemus in uno Spiritu ad Deum æternum.

Tibi, Pater incomprehensibilis, et Fili, cum Spiritu Sancto, omnis adoratio, hymnus et gloria sine fine. Amen.

Fecisti nos, Christe, cives Sanctorum tuorum et domesticos Dei, ut non simus hospites, peregrini atque extranei.²³

Gentes factæ sunt coheredes, concorporales et comparticipes promissionis divinæ in te, Jesu Christe, per quem facti sunt homines divinæ consortes naturæ.²⁴²⁵²⁶²⁷

Pater Christi, ex quo omnis paternitas in cœlo et in terra nominatur, da nobis secundum divitias gloriæ tuæ corroborari in anima per Spiritum Sanctum, qui nobis a te clementissime infundatur, ut Christus per fidem in nostris cordibus jugiter commoretur.

Da nobis, Domine, scire supereminentem scientiæ caritatem Christi, ut impleamur in omnem plenitudinem tuam, Conditor universi.

Tibi, qui potens es omnia facere abundantius quam petimus aut intelligere possumus, secundum virtutem tuam qua operaris in nobis, sit gloria in generationibus cunctis.

Da nobis digne ambulare vocatione qua sumus vocati a te, cum omni humilitate, patientia et mansuetudine, supportantes invicem in caritate, solliciti servare unitatem spiritus in vinculo pacis.

Unus es Deus et Pater omnium, qui super omnes et per omnia atque in omnibus nobis consistis per ævum.

Unicuique nostrum data est gratia secundum mensuram donationis tuæ, Christe, qui per Incarnationis mysterium descendisti in inferiores partes terræ.

Qui descendisti, ipse es qui ascendisti super cœlos omnes, ut tua dominatione, operatione et gratia omnia adimpleres.

Non esse permittas nos parvulos fluctuantes, omni vento doctrinæ circumagitatos atque vagantes.

Tibi Unigenito Dei cum Patre et Spiritu Sancto omnis honor, beatitudo et gloria: cum quibus es unum esse et posse, una virtus et Deitas atque essentia. Amen.

Fac nos, Domine Deus altissime, renovari spiritu mentis nostræ, novumque induere hominem, secundum Deum creatum in justitia et veritatis sanctitate.

Fac nos invicem benignos, misericordes, et ignoscentes, sicut tu, Deus, in Christo donasti nobis, qui toties invenimur transgredientes.

Fac nos, Deus benedicte, imitatores tuos sicut carissimos filios, ut ambulemus in dilectione, quemadmodum Christus dilexit nos, et tradidit semetipsum pro nobis oblationem et hostiam tibi Patri in odorem suavitatis.²⁸

Imple nos, Pater, per Christum Spiritu Sancto, ut nobis ipsis loquamur in hymnis, psalmis et canticis spiritualibus, corde devoto: cantantes et psallentes in cordibus nostris tibi, Domine; gratias referentes tibi in omnibus, Deus Pater, in Christi tui Filii nomine.

Tu, Christe, dilexisti Ecclesiam, tradens te ipsum pro ea, ut illam sanctificares, mundans lavacro aquæ in verbo vitæ, Baptismatis forma, ut exhiberes tibi gloriosam Ecclesiam, non habentem maculam, rugam aut similem deformitatem.

Conforta nos, Deus, tua virtute et gratia; indue nos tua armatura, ut stemus invicti contra diaboli machinamenta.

Indue nos lorica justitiæ et fidei scuto, galea quoque salutis, et gladio spiritus, qui est Dei sermo.

Non enim est nobis dumtaxat aut principaliter luctatio adversus carnem et sanguinem, sed adversus principes et potestates, contra apostatam cœli militiam, omnem potestatem aeriam.

Indesinenter da nobis te, Domine, exorare in spiritu, Deus trine et simplex, cui est honor et gloria cum omni latriæ cultu. Amen.

Galat. 1, 4, 5. ↩
Galat. 1, 8, 9. ↩
Ibid. 10. ↩
Ibid. 1, 6. ↩
Ibid. 11, 6, 16. ↩
Ibid. 19, 20. ↩
Ibid. 11, 3. ↩
Ibid. 13. ↩
Ibid. 26. ↩
Ibid. 14, 5. ↩
Ibid. 6, 7. ↩
Ibid. 18. ↩
Galat. xiii, 11. ↩
Galat. viii, 9. ↩
Galat. v, 19-23. ↩
Ibid. 26. ↩
Ibid. v, 24. ↩
Ibid. 10. ↩
Ibid. 17. ↩
Ephes. i, 3-7. ↩
Galat. v, 11, 12. ↩
Ibid. 8-10. ↩
Ibid. 19. ↩
Galat. iii, 6. ↩
Ibid. 14, 16, 18. ↩
Galat. ii, 4, 5. ↩
Ephes. vi, 1. ↩
Ephes. v, 2, 3. ↩

Chapter 49 of 78

Laus Dei ex pauli ad galatas epistola

Footnotes