Skip to the text
Ember
PT

Laus Dei ex evangelio, de Christi passione

EGRESSUS, Domine Jesu, trans torrentem Cedron, venisti cum Apostolis in villam Gethsemani. Ingressusque hortum, ter Patrem rogasti ut auferret, si fieri posset, passionis calicem tibi.

Tunc præ naturali mortis horrore, factus est sudor tuus ut guttæ sanguineæ;1 et facto te in agonia prolixiusque orante, apparuit tibi angelus te confortans, missus a Patre.

Dixisti: Tristis est anima mea usque ad mortem.23 Hinc adversariis tuis profectus es obviam, nullum habens pavorem.

Quum te Jesum Nazarenum ab eis quæsitum dixisses, abierunt retrorsum, ruentes in terram, neque surgentes donec tu annuisses.4

Tunc te plusquam duodecim angelorum legiones posse obtinere a Patre dixisti;5 et te invadentem impiissimum servum, dire læsum, pie curasti.6

Injecerunt in te Filium Dei manus sacrilegas, te ligantes:7 quo viso, fugerunt discipuli, tibi commori formidantes.8

Quum juste respondisses pontifici, dedit tibi alapam verna sceleratus.9 Hinc ductus ad Caipham, an Filius Dei esses, ab eo es adjuratus.

Cui dixisti, te Christum mundum hunc redimentem, quodque visuri essent te a dextris virtutis Dei sedentem, atque ad judicandum in cœli nubibus venientem.

Quo dicto, te blasphemum morteque dignum concorditer ululabant; et viri te tenentes, te irridebant, velabant, conspuebant, colaphizabant, ac palmas tibi in faciem dabant, dicentes:10 Prophetiza, quis te percussit, o Christe? Et alia multa blasphemando dixit adversus te populus iste.

Tunc Petrus te summam Veritatem ter denegavit:11 qui clementer respectus a te et conversus ad se, suum piaculum deploravit.

Mane facto, te vinctum, consputum, discoloratum obtulerunt Pilato, objicientes tibi diversa facinora:121314 quod Pilatus novit venire ex odio.

Seductorem, blasphemum, sæcularis potestatis violatorem te accusarunt, a quo sapientia salutaris, divina operatio, omnis potestas et lex profluxerunt.

Te Sapientiam Dei, Herodes sprevit atque illusit alba veste indutum; te laceraverunt flagellis, coronaveruntque spinis, purpura pro derisione vestitum.

Sic consputum, sanguine sacro perfusum, spinis coronatum, et purpurea veste indutum, eduxit te præses ad populum Judæorum, ut redderet eum tibi placatum.

Tunc vociferabant: Tolle, tolle, crucifige eum.15 Sicque te Agnum innocentem nil respondentem, damnavit præses ad crucis patibulum.

Fac nos, Christe, tibi amorose configi: cui cum Patre et Spiritu Sancto est honor et gloria in sæculo æternali. Amen.

Footnotes

  1. Luc. XXV, 44, 43. ↩

  2. Matth. XXVI, 36-44. ↩

  3. Matth. XXVI, 38, 46. ↩

  4. Joann. XVIII, 4-6. ↩

  5. Matth. XXVI, 53. ↩

  6. Luc. XXV, 51. ↩

  7. Joann. XVIII, 12. ↩

  8. Matth. XXVI, 56. ↩

  9. Joann. XVIII, 22. ↩

  10. Matth. XXVI, 57, 63-68. ↩

  11. Ibid. 69-75. ↩

  12. Matth. XXVII, 1, 2; ↩

  13. Luc. XXVII, 11 et seq.; ↩

  14. Luc. XXVII, 2-5. ↩

  15. Joann. XIX, 1-6, 15, 16. ↩

Chapter 45 of 78