Laus Dei ex secunda pauli ad thessalonicenses epistola
FAC fidem nostram supercrescere, Deus;1 caritatem uniuscujusque abundare in alium plenius.
Impii sustinebunt æternas in interitu pœnas a facie gloriæ majestatis tuæ, Christe, quum veneris glorificari in Sanctis, et admirabilis fieri in omnibus qui crediderunt in te.2
Dignare nos, Deus, vocatione tua sancta, et imple omnem voluntatem bonitatis tuæ in nobis semper, pietate æterna.
Tu, Christe, illum iniquum perditionis filium interficies spiritu oris tui, destruens illum illustratione adventus tui : qui tantos seducet via calliditatis multiplici.
Deus Pater, qui dilexisti nos, dans nobis consolationem æternam et spem bonam in gratia, exhortare clementer et robora semper corda nostra.3
Libera nos a malis et importunis hominibus, ut et subtrahamus nos ab omni fratre ambulante inordinate, perdurante in vitiis.
Domine Deus pacis, da nobis pacem sempiternam in omni loco. Cui honor, beatitudo et gloria sine fine, Deo simplici, uni ac trino. Amen.
Footnotes
Chapter 52 of 78