Laus Dei de eodem

AURO splendorem, melli dulcedinem, balsamo multam nimis virtutem dedisti; oleo suavitatem et claritatem, gemmis, herbis, distinctas pretiosas et innumerabiles qualitates indidisti.

Vino dedisti saporem, sonis consonantiam, universoque mundo pulchritudinem admirandam et ordinis elegantiam.

Et quidquid decoris, dulcedinis, potestatis, perfectionis habent creata, a te, Deus incomprehensibilis, infinite, omnipotens, sunt sortita.

In mundi creatione patet omnipotentia tua; in ejus gubernatione ostenditur sapientia tua immensa; in rationalium creaturarum remuneratione monstratur tua justitia.

Fac nos te in tuis effectibus contemplari, amare ac venerari, et cuncta creata ad tuum semper honorem referre, atque in te finaliter demorari.

Tibi, Pater et Fili ac Spiritus Sancte, Trinitas adoranda, laus, honor, virtus et gloria per sæcula non terminanda. Amen.