Laus Dei de angelicis spiritibus

Tu, Trinitas benedicta, unitas simplicissima, Deus gloriose, super unitatem quamdam et trinitatem cuncta fundasti creata, opifex gratiose.

Novem quippe angelorum spirituum ordines es molitus: quos in triplicem hierarchiam incomprehensibili sapientia es partitus; atque in qualibet hierarchia tres ordines statuisti, sapientissime Deus.

Denique in quolibet ordine, supremos, infimos mediosque ordinasti, o Domine.

In suprema hierarchia cœlesti, Seraphim Cherubimque et Thronos constituisti; in media Dominationes, Virtutes et Potestates esse jussisti; in infima Principatus, Archangelos et Angelos posuisti.

Tam sincere, Deus æterne, da nobis nunc conversari, ut finito hujus peregrinationis curriculo, prædictis mereamur angelorum ordinibus adunari.

Tibi, inæstimabilis Conditor, simplicissime atque mundissime Deus, omnis beatitudo, hymnus, honor et gloria, qui regnas in Trinitate perfecta sine fine in cœlis. Amen.