Laus Dei de cherubim

Tu, Deus excelse et benedicte, post Seraphim Cherubim constituisti; hujusque ordinis sacratissimos spiritus, plenitudine quadam scientiæ eminenter ornasti.

Super hos sapientiæ atque scientiæ tuæ thesauros copiose effundis, ita ut ipsi de plenitudine sua, sequentibus choris angelicis fluenta scientiæ liberaliter communicent omnibus.¹

Hæ mentes supernæ a te, Domine, sortitæ sunt virtutem excellenter cognitivam, altissimæ illuminationis capacem, divinorum mysteriorum inspectricem, aliorumque angelicorum spirituum illuminativam.

Fulgent, te Deo desuper irradiante, veritatis clarissima venustate, splendore sapientiæ deiformiter decoratæ; tibique fonti veritatis inavertibiliter sunt intentæ.

Tanta, Deus piissime, intellectum nostrum veritatis contemplatione perfunde, tam claram ei ac stabilitam sapientiam tribue, ut in eo quasi in Cherubim non cesses splendere.

Tibi scientiarum Domino, Deo uni ac trino, honor et gloria sine fine, Patri et Filio ac Spiritui Sancto. Amen.

Footnotes

1. Coloss. II, 3. ↩