Laus Dei de ordine virtutum

ORDINI Dominationum subjunxisti, Deus præclare, chorum Virtutum cœlestium : quibus ad prosequenda officia sibi præfixa, fortem, virilem et infatigabilem fortitudinem præstitisti, Rex omnium.

Hinc ad deiformium susceptionem illuminationum, in nullo imbecilliter infirmantur; sed ad te universæ fortitudinis principem inconcussibiliter eriguntur, subjectosque ordines in te reducere et tibi plenius conformare adoriuntur.

Harum Virtutum sanctarum est distributionem Dominationum exsecutioni mandare, atque principia universalis operationis operi applicare, et supernaturalia perpetrare.

Nos imbecilles et inopes, Deus Virtutum, semper confirma : cui honor et gloria sempiterna; qui trinus es in personis, et unus in essentia. Amen.