Laus Dei de ordine principatuum
SUPREMUM chorum in infima hierarchia angelica, statuisti ordinem Principatuum, o sapientia Dei fontana.
His principalitatem et præsidentiam super subsequentes duos ordines contulisti : quos ad te totius luminis fontem reductione sursumagunt convenienti, se ipsos et illos conformare studentes tuæ sempiternæ divinitati.
His boni communis regnorum, provinciarum ac civitatum dispositionem crederis commisisse :1 inter quos magnum Principem novimus Michaelem, qui olim præfuit Synagogæ.
Hic nobilis signifer cœli, paradisi præpositus, stat pro acie tua, Deus vivens, rhomphæam propugnationis victoriose extendens, et contra adversarios, Quis ut Deus?2 voce terrifica intonans.
Fac nos, Deus, contra vitia victorialiter reluctari, tibique altissimæ Trinitati, Patri et Filio cum Spiritu Sancto, honorem semper et gloriam in cordis offerre altari. Amen.
Footnotes
Chapter 70 of 78