Laus Dei de ordine potestatum

VIRTUTIBUS ordo Potestatum, te Principe universorum ordinante, annectitur : qui ad divinas influxiones sibi congruentes inconfuse suscipiendas, ordinariam potestatem sortitur.

Habent, o Deus, Potestates istæ a te supermundanam invisibilemque intellectualis potestatis ordinationem, qua potenter atque benigne infimam erigunt hierarchiam ad pleniorem divinarum tuarum proprietatum assimilationem.

Infimam namque hic ordo continet hierarchiam, in divinæ tuæ lucis, Deus adorande, deificatam assimilationem promovens eam, non tyrannice sua potestate abutens ad illam.

Distributionem ab ordine Dominationum procedentem, atque a choro Virtutum exsecutioni mandatam, hic ordo, te Deo jubente, custodit inconfusam servatque fixam : quoniam destructiva exsecutionis præfatæ evellit per suam potentiam.

Tua est, Deus omnipotens, harum agilitas Potestatum, colla tartari flammeo zelo prementium, ne quantum cupiunt, agere queant in perniciem nostram ac detrimentum.

Fac nos, Deus, angelica ope, dæmonum tentamenta calcare, quæ tua sunt alacriter actitare, superiorumque nostrorum mandata inconfusa servare.

Tibi, Trinitas sancta, Pater, Fili, Spiritus Sancte, honor, imperium, gloria sempiterna ac infinita omni ævo ac tempore. Amen.