Laus Dei de impressionibus aeris

In aere, Domine, multiformes effectus tu generas: impressiones et exhalationes, nubes, ventos et pluvias.

Cœlum nubibus ad nutum mox operis; coruscationes repente emittis; tonitrua tua hominum corda concutiunt metibus.¹

Aquas ligas in nubibus, Domine, et guttatim jubes descendere, ne simul erumpendo queant cuncta subvertere.

Per causas secundas producis in aere varias impressiones: cometas, halonem, coronas, voraginem, stellas cadentes, capras saltantes, asub, caliginem, pruinam et nebulam, grandinem, nivem ac iridem, et volantem draconem.

Omnis lapis pretiosus, omnis liquor prænobilis, et quidquid desiderabile est in rebus, nonne opus tuum est, Creator superlaudabilis?

Tu irrationalibus animalibus proprias atque mirandas largitus es proprietates, virtutes, operationes, industrias eorum naturis convenientes.

Fac nos, Deus mirabilis, te in universis tuis effectibus contemplari, atque per hoc tua caritate fortiter inflammari, et ex omnibus ad tuæ sublimitatis venerationem excitari.

Laudent, benedicant et superexaltent te, Domine, omnia opera tua.

Tibi honor, virtus, beatitudo, laus, gloria, Pater et Fili ac Spiritus Sancte, per sæcula cuncta. Amen.

Footnotes

1. Ps. cxlvi, 8. ↩