Laus filii Dei

Tu imago Patris paris Plena, vera, naturalis, Ratioque exemplaris Omnis entis mundialis.

Una contemplatione Se et cuncta intuetur Pater : generatione

Hinc et una perhibetur Te Verbum suum gignere : Cujus dotemur pignore. Tu imago te gignentis, Et exemplar omnis entis.

Tu nata Sapientia Es, plena rationibus; Splendor gloriæ, entia Suis ornans splendoribus; Gloriaque Genitoris, Verbum quoque sui oris.

Sincera emanatio Lucis es omnipotentis, Internaque prolatio Dei intra se loquentis; Speculum immaculatum Majestatis es paternæ, Virtus prima potestatum, Sermo Mentis sempiternæ.

Tu character substantiæ Patris, fons elegantiæ; In te summa pulchritudo, Potestatis plenitudo, Species in imagine : Non nostra id indagine Scimus, Christe. Æqualitas In te cum Patre, paritas.

In te cuncta intuentur Sancti qui te perfruuntur; te mentes edocentur In hac via et visuntur.

Fons quippe sapientiæ, Verbum Dei in excelsis, Unius es potentiæ Cum Patre. Mihi tu mel sis.

Mundum Patre producente, Cuncta secum componebas; Omni die gaudens mente, Semper coram hoc ludebas.

Sis quamvis beatissimus In te ac perfectissimus,

Tuas tamen delicias, Tu omnes dans divitias, Ais cum natis hominum Esse. Te laudo Dominum.

Comprehendis prorsus plene, Amas Patrem præamœne, Intuens æternaliter, Supereffectualiter.

At quidquid es, potes, habes, Te a Patre scis sumpsisse : In hac fide nulla labes, Quam et scimus te dedisse.

Amore superfervente Penitusque infinito, Patrem amas tam intente : Id degustem corde læto.

Immenso demum gaudio, Ad hunc Patrem te convertis : Negantem hæc non audio; Fides certa hæc expertis.

Tu in Patris sinu mente Quiescis æternaliter; Delectaris in gignente Te, interminabiliter.

Universæ rationes Caritatis sanctæ, mere Per considerationes, Inter te et Patrem vere Esse, plene comprobantur His qui a te illustrantur :

Ut mutua amatio, Plena communicatio, Identitas essentiæ, Claritas intuentiæ, Voluntatis conformitas, Nulla culpæ enormitas; Summaque similitudo, Infinita pulchritudo, In uno generatio, In altero filiatio.

O Patris Sapientia, Mane in conscientia; Via nobis sis ad Patrem, Nostrum te fecisti fratrem.

In te semper gradiamur, Christe, via ac veritas, Et felices perducamur Ad te, lux, vita, Deitas.

Laus, virtus, adoratio, Sempiterna laudatio, Tibi Patre cum non nato Spirituque increato.