Laus Dei ex evangelio, de sermone

Christi in monte.

Tu, Christe, novus legifer, Novam legem advexisti; Evangelii signifer, Documenta effudisti

Omnino saluberrima, Perfecta et pulcherrima.

Spiritalem, cœliformem Consummatamque per orbem Legem sanctam seminasti, Multis modis confirmasti.

Octo beatitudines, Mentis perfectitudines, Docens, pauperes spiritu, Fers beatos adhibitu : Quoniam quidem ipsorum Regnum vere est cœlorum. Spe tantæ opulentiæ Congaudeant egentiæ.

Mites atque pie flentes, Æquitatem sitientes, Pios seu misericordes Hominesque mundicordes, Pacificos, patientes Adversa pro justitia, Omnes hos beatos entes Doces, spondens eximia.

Cunctis munerationem, Aptam præmiationem, Christe judex, promisisti, Quod sint Dei nati isti : Mundis, Dei visionem; Ejus filiationem Pacificis spopondisti.

Æquitatem optantibus, Intimam saturitatem; Piis ac miserantibus Promisisti pietatem; Adversa tolerantibus, Cœlestem hereditatem.

Verum unusquisque horum Cuncta ista sortietur. Sed tu, Christe doctor morum, Quem cor omne veneretur, Fers pulchram per scientiam In his correspondentiam Præmii atque meriti, Dux cordis tibi dediti.

Tu pastores et doctores, Terræ sal et lucem mundi Ais. Nostros rege mores, Sensum cordis da profundi.

Luceat lux vestra, doces, Christe, sacras promens voces, Palam coram hominibus, Ut cernant cum luminibus Actus vestros virtuosos, Deum laudent, non vanosos.

Id ad actus exemplares, te jussos, salutares, Retulisti, Deus verus. In te mente sim sincerus.

Fratri suo irascentem, Reum ais judicio; Raca ei proferentem, Dicis reum consilio; Stultum eum exprimentem, Gehennali supplicio.

Cupientem quid offerre Tibi, cultumve afferre, Vis primum satisfacere, Aut voto id peragere.

Mulierem contemplantem Concupitu dominante, Ais esse hunc mœchantem, Animo prævaricante.

Membra scandalizantia Jubes tolli quoad usum; Ad culpam inductantia Vis præscindi ob abusum.

Conjugem vis non relinqui Ni ob fornicationem; Omne juramentum linqui Vis, ob perjurationem.

Vis ne malo resistamus, Sed cædendam præbeamus Unam genam, una cæsa, Mente prompta et non læsa.

Jubes æmulos amemus, Bona insuper præstemus Nobis maledicentibus, Nos item persequentibus, Et ut pro his mentaliter Oremus te veraciter, Ut cœlestis Patris nati Simus, eum imitati, Qui oriri facit solem Atque pluit super prolem Omnem, bonam ac perversam. Mentem tibi da immersam.

Perfectos, misericordes, Omnes abluentes sordes Vis nos esse, Fili Dei, Ut assimilemur ei Qui in cœlis est, benigno Et perfecto Patri digno.

Claris jubes nominibus, Ut non coram hominibus Bona nostra operemur Ut ab illis conspectemur.

Clauso thalamo orandum, Læta mente jejunandum Doces, Christe : da implere Cuncta hæc devote vere.

Tibi, beata Trinitas, etc.

Laus Dei ex Evangelio, de eodem.

JUBES non thesaurizare In hac terra, sed in cœlo : Ibi cor versare, clare Constat, quo thesaurum velo. Hinc virtutes congregemus, Actus sacros cœlo demus.

Quum recta est intentio, Bona (inquis) est actio. Nullum posse deservire Dominis discordantibus, Motibusque contraire Nos et sollicitantibus

Doces, Christe, fersque curam De futuro, nocituram.

De amictu atque victu Curam vetas superfluam, Et conformi jubes dictu Spem in Deo uberrimam.

Verbum consolatorium Ad electos direxisti; Ne quid tribulatorium Vereantur, monuisti :

Ne formides, grex pusillus, Nec te cursus turbet ullus, Quia tibi regnum dare Placet Patri salutare.

Judicare, condemnare Inordinate, prohibes; Indulgere et donare, Doces, Rabbi, non cohibes.

Parva mala aliorum Seu festucas attendentes, Et suorum vitiorum Trabes non inspicientes, Christe Jesu, increpasti; Trabes tollant, imperasti.

Ne sanctum demus canibus, Nec gemmas porcis talibus, Jubes, ut capacitati Hominumque dignitati, Quæ promuntur, coaptentur. Tibi corda præparentur.

Ut oremus confidenter, Protestatus es clementer, Hunc qui petit, impetrare, Et quærentem inventare : Omnis qui petit, accipit; Omnis qui quærit, invenit; Pulsanti reserabitur, Confidens non frustrabitur.

Quum carnalis pater proli Bona donet postulanti :

Nonne plus tu, Pater poli, Summe Deus, deprecanti Filio dabis Spiritum Paracletum præinclytum?

Vis ut proximis agamus Nobis quæ ab his optamus : Hoc nam lex est et Prophetæ. Caritati vacem mente.

Per angustam portam ire, Arctam viam introire, Ut salvemur, exhortaris : Viam nam perditionis Latam, et damnationis Portam spatiosam faris.

Pseudo doces evitandos, Deceptoresque damnandos. Bonos et de bono corde Bona loqui protestaris; Malos fundo de vecorde, Mala ferre tu profaris.

Ex cordis abundantia Prodit oris effantia; Sermo quoque est imago Cordis, signum et indago : Qualis vir, et sermo talis. Fando sis prudentialis.

Non omnem qui te Dominum Vocat perhibes salvandum; Sed unumquemque hominum Asseris glorificandum, Qui cœlesti Patri paret, Et mortali culpa caret.

Dominum te appellare, Et mandata non servare, Quid est, nisi mendacium? Esto nobis solatium.

Multi die judicii Dicent metu supplicii, In te signa se fecisse, Dæmonesque expulisse, Ac virtutes peregisse.

Quibus dices : Non vos novi Per prædestinationem; Maledicti, sicut vovi, Ite in damnationem.

Verba tua percipiens, Et actu hæc perficiens, Similatur sapienti Supra petram construenti.

Audiens nec perficiens, te fertur insipiens, Super arenam ut construens, Cujus domus est concidens.

Universa adimplere Documenta hæc, Salvator, Semper da, ut obtinere Mereamur a te, dator, Dictarum beatitudinum Præmia, o fons luminum. Tibi, beata Trinitas, etc.

Laus Dei ex Evangelio, de diversis Christi miraculis.

LEPROSUM cum imperio Sanans, hoc magisterio Famulo centurionis Gratiam sanationis Absens carne impendisti, Quem vicinum morti scisti.

Unicum natum viduæ Dilectum individue, Suscitasti coram plebe : Hincque mater est lætata, Turba quoque admirata. Nos illustra, summe Phœbe.

Tantæ eras paupertatis, Dator omnis bonitatis, Ut quo caput reclinares, Te carere affirmares.

Quid ergo in divitiis Relaxas te deliciis,

O infelix Christiane ? Christum pensa, o insane.

Et tu, Christe, operaris. A te mea mens regatur.

Orta tempestate maris Dum in navi ferebaris, Ventum, mare increpasti, Et cessare imperasti, Dicens : Mare, obmutesce. Et quievit. Nos compesce.

Operatur incessanter Pater tuus, incunctanter, Totum mundum gubernando; Item animas creando, Panem transubstantiando, Esse rerum conservando.

In terra Gerasenorum, Duorum sævissimorum Dæmoniacorum mentes Sanas suique valentes Agens, unum legione Dæmonum curasti, bone.

In intellectualibus Summis ac infernalibus, Mediisque terrestribus, Mentibus subcœlestibus Plurima indesinenter Agis, Pater, excellenter.

Legionem id petentem, Porcos sinebas ingredi : Quo te scimus tam potentem, Ut ni permittas, invidi Nulli queant hi nocere. Ab his, Christe, nos tuere.

Non potest tuus Filius, Quo nihil amabilius Aliquid a se facere, Ni quod te cernit agere : Non est enim a se ipso, Sed omnino a te ipso.

Dixisti paralytico Per triginta octo annos Ægro, jussu salvifico : Surge, lectum fer. Tyrannos Id Judæos conturbavit, Festo lectum quod portavit.

Quidquid facit Pater tuus, Facis et tu, natus suus, Similiter, veraciter, Seu æque principaliter, Non ut homo, sed ut Deus. Sis in cunctis rector meus.

In tuis mirabilibus, Ingeniis habilibus Modus agendi clarior Constat factis ac rarior, Quod tam imperialiter Egisti, ac subitaliter.

Te nam Pater amat vere, Cuncta facta sua mere Monstrat tibi, quem gignendo Egit plenum in sciendo, Dans tibi sapientiam, Suam dando essentiam.

Tua, Christe, paupertate Omni dita nos virtute. Te sequamur timorate, Perfruamur te salute. Tibi, beata Trinitas, etc.

Tuus Pater ut suscitat Mortuos et vivificat ; Sic tu, quos vis vivos facis, Sed eosdem, Christe, pacis Unus ens cum Patre actor, Atque indivisus factor.

Laus Dei ex Evangelio, de sublimibus quibusdam Christi documentis.

Pater nullum est judicans Latione sententiæ : Judicium communicans Tibi actu loquentiæ

PATER tuus, ut testaris, Usque modo operatur ;

Censuræ judicialis, Causa formæ humanalis, Ut te omnes honoremus, Et ut Patrem adoremus.

Qui nam te non veneratur, Patrem tuum aspernatur; Qui te non honorificat, Patrem tuum vilificat.

Incessanter opereris In nobis per clementiam, Pater, neque dedigneris Sacram dare scientiam; Actua, serva, perfice Mentem, culpas interface.

Tibi, beata Trinitas, etc.