Laus Spiritus Sancti

Ex Patre atque Filio Ut ab uno principio Procedis, Sancte Spiritus, Ut docemur divinitus, Deus verus ab æterno, Cuncta regens de superno.

Pater quippe et Filius Unum, nil mirabilius, Quo te spirant, consistentes Unum sunt, non differentes.

Es namque emanatio Voluntatis tanquam amor; Hancque fidelis latio, Philosophicus non clamor, In te Patre atque Prole Unam pandit. Tu nos cole.

Pater et Unigenitus Invicem se diligentes Te spirant (sic es editus), Condilectum te habentes, Te amantes infinite, Tantum ut se : tu fons vitæ.

Patris Filiique nexus Es, dulcissimus complexus, Amor, osculum amborum,

Præsincera pax duorum, Infinita communio, Plena item diffusio.

Tu immensa suavitas, Superæstuans caritas, Liberalitasque plena, Et tranquillitas serena, Æternalis lætitia. Absterge cuncta vitia.

Simul spirant, amplexantur, Incessanter contemplantur Te, prædulcis Consolator, Omnemque opulentiam, Gloriam, eminentiam Suam, tibi dant, Creator.

Summa suavitudine, Immensa quietudine, Tantaque hilaritate Ac deliciositate, Simul stant ad te conversi, Et tu ad hos, lux detersi.

Quiescis æternaliter, Es individualiter In gignente et genito : Manas hinc individenter, Et procedis immanenter. Me clementer protegito.

Benignitas, suavitas, Bonitas, dulcor, caritas, Tibi vere propriantur; Tibi quoque deputantur Horum operationes, Gratiosæ actiones.

Tu mœstorum consolator, Impiorum emundator, Donum Dei altissimi, Vivum flumen ditissimi,

Voluptatis deificæ Torrens plenus et inundans, Omnis mentis gratificæ Adimpletor præabundans.

In te vera divinitas, Infinita felicitas; Tu summe præamabilis, Dulcis, desiderabilis.

Donum tu es largissimum, Primum, opulentissimum, In quo datur omne datum, datore primo latum.

Tu septiformis gratia; Tanta tua et plenaria Bonitas et clementia, Amor, munificentia, Ut des te ipsum mentibus Dona tua sumentibus : Hæc summa liberalitas, Consummataque caritas.

Tu abyssum pietatis Et ardorem caritatis Tuæ super nos declara; Corda nostra tibi para, Semper fove et tuere, Prout nosti nos egere.

Nos illustra et accende, Vitam sanctam nunc impende, Pietate mirifica Nos propter te deifica.

Tibi, Patri ac Filio Laus, honor cum consilio, Perennis adoratio, Jugis regratiatio.

Laus superbenedictæ Trinitatis.

O gloriosa Trinitas, In te nulla est finitas, Superfelix et perfecta, Nusquam plene intellecta.

Mutua tua caritas, Mutua complacentia, Mutua perspicacitas, Mutua perfruentia Infiniti est fervoris,

Infinitique dulcoris, Infinitæ claritatis, Tantæque jucunditatis.

Omnis tu felicitatis Possides plenitudinem; Omnis optabilitatis Habes perfectitudinem.

In te plena communio, Superlæta diffusio, Voluptuosa unio : Tua fide me munio.

Sola supergloriosa, Infinite luminosa, Tibi soli plene nota, Audi clemens nostra vota.

In te personæ singulæ Sunt in singulis perbonæ, Circumincessibiliter Et inconfusibiliter, Incomprehensibiliter, Vere indicibiliter.

O præeminens Trinitas, Felicitatis gloria Tuæ, simplex Divinitas, Inclyte tibi propria, Infinita perhibetur : Hinc cor meum gratuletur.

Tu supersplendidissima, Superopulentissima, In te tibi sufficiens, Universa efficiens, Implens, servans moderanter, Intuens nos incessanter.

Sola es incircumscripta, Adoranda, benedicta, Tua in simplicitate Manens fixa veritate, Superessentialiter, Summe ac æternaliter.

O supersancta Trinitas, Superpulchra Divinitas,

Tu una es essentia, Unaque sapientia, Unus simplex intellectus, Unus insuper affectus, Una virtus, una vita, Et voluntas non partita.

Quod absolute dicitur, In te idem suscipitur. Super mundum, subter mundum, Extra mundum, intra mundum, Ante cuncta, trine Deus, Et post cuncta, o Rex meus.

Super orbem, subter orbem, Extra orbem, intra orbem, Ante cuncta, trine Deus, Et post cuncta, es, Rex meus.

Super cuncta non elatus, Infra cuncta non substratus; Intra cuncta non inclusus, Extra cuncta non exclusus.

Totus superpræsidendo, Totus subter sustinendo; Totus extra complectendo, Totus intra adimplendo,

Intra res non coarctaris, Extra has non dilataris; Subter nullo fatigaris, Supra nullum sustentaris.

Cuncta movens, non moveris, Locum tenens, non teneris, Tempus mutans, non mutaris, Vaga firmans, non vagaris.

Absolutam, puram, fixam Præsta mentem et innixam Tibi summæ Trinitati, Contemplantem te amanter, Suspirantem æstuanter Tibi puræ Deitati.

Honor, regnum, imperium, Laus, virtus et mysterium Tibi, Deus, in æternum.

Tu nos transfer in supernum, Ad te laudandum jugiter, Videndumque salubriter.