Laus Dei ex evangelio, de futuro judicio

ANTEIBUNT hunc adventum Signa multa perhorrenda, Circa ipsum firmamentum, Solem lunamque stupenda, Et pressura populorum, Ex confusa marinorum Fluctuum sonitione, Gurgitumque motione.

Sol et luna fuscabuntur, Stellæ labi videbuntur; Metu homines arescent Malorum imminentium, Et virtutes expavescent Cœlorum, Judex gentium.

Tunc in cœlo apparebit Signum crucis, o Salvator. Venientem te videbit Omnis homo, o scrutator, Cum gloria in nubibus Supernisque virtutibus.

Ad tribunal adducentur Tuum et discutientur Cuncti homines, et dabis Singulis quod meruerunt. Tunc districte judicabis Hos qui te non curaverunt.

Tunc videntes, Christe, erunt Te hi qui te pupugerunt, Et ingrati qui fuerunt, Nec secundum te vixerunt.

Communis resurrectio Fit repente, te jubente, Cinerumque collectio Subito, te disponente, Fiet per sanctos angelos, Per omnes terræ angulos.

Hanc censuram formidare Et ad eam nos parare Da, o Judex metuende; Jugem opem tu impende.

Tibi, beata Trinitas, etc.

Laus Dei ex Evangelio, de variis Christi doctrinis atque mysteriis.

TANQUAM justi confidentes In se atque contemnentes Alios, condemnas, Christe. Humiles nam pœnitentes, Non justos superbientes, Præfers. Juvans non desiste.

Voluntatem sciens tuam, Nec eidem subdens suam, Scita digne adimplendo, Plus hunc tuum os damnabit, Plagis multis vapulabit,

In infernum retrudendo. Qui non novit, et offendit, Mitius condemnabitur. Cui namque plus impendit Deus, hunc plus causabitur.

Jubes, Christe, ne gravemur Crapula, ebrietate, Curis mundi, sed precemur Semper, vigilantes rate, Stare ante te ut digni Consistamus, et benigni.

Dices ad dextram stantibus, Te ex corde amantibus : Advenite, benedicti Patris mei, non relicti; Regnum vobis præparatum Acceptate consummatum.

Ad lævam consistentibus Nunc inobedientibus Dices : Ite, maledicti, In æternum ignem, ficti, Præparatum diabolo, Omnique ejus zabolo.

Post hæc verba prædixisti Tuis, Christe, te passurum; Diem quoque præfixisti, Hoc te ferens moriturum.

Scitis, inquit, quia fiet Pascha legis post biduum, Et plebs me mox crucifiget, Qui resurgam post triduum.

Sacerdotes congregati Sunt, Scribæ et Pharisæi, Inter se consiliati, Qualiter te Verbum Dei Traderent et suspenderent Sic ne turbam offenderent.

Tunc te Judas his vendebat, Bonis mala rependebat. Quo audito congaudebant, Nummos dare promittebant.

At in die sanctæ Cœnæ, Quæ futura sciens plene, Petro et Joanne missis, His dedisti in commissis Pascha tibi præparare, Quod volebas manducare Amanter cum discipulis, Locum præbens decipulis.

Desideravi (inquiens) Vobiscum pascha edere Hoc, antequam sim patiens. Tunc curasti disserere Tuis, a quo traderis, Et a quibus necareris.

Christe, da ut operemur Quæ cognoscimus agenda, Ut a te glorificemur Die illa perhorrenda.

Tibi, beata Trinitas, etc.