Laus verbi incarnati

Te Patris Unigenitum Fatemur vere editum Hominem temporaliter, Ex vera matre homine, Quam tu creasti, Domine, Electa æternaliter.

Mater Virgo est Maria, Tota gratiosa, pia : Cujus juvamur precibus, Purgamur culpæ fœcibus.

Tu pro nobis incarnatus, Inter nosque conversatus, Perfectam humanitatem Per immensam pietatem Unisti hypostatice Deitati viatice.

Non personam, sed naturam Nostram, tuam plasmaturam, Tibi suppositaliter Junxisti integraliter.

Simul ventre in materno, Corde manens in paterno, Corpus tuum tu formasti, Animamque tunc creasti.

Et hæc duo conjunxisti Invicem ac formaliter, Sicque juncta assumpsisti Tu Verbum personaliter.

Assumpta est humanitas Ad æternum Verbi esse : Una est personalitas Tua, Christe, proles Jesse.

In hoc esse personali, Increato, æternali,

Est subsistens humanitas, Quam Verbo junxit caritas.

Persona, filiatio Una tibi tribuitur ; Natura, generatio In te duplex adstruitur.

Ipsa namque filietas Est respiciens personam ; Sed naturam nativitas. Nobis vitæ da coronam.

Pura et inviolata In te, Christe, manet rata Natura tua gemina, Proprietate servata Utriusque inturbata. Ob nos natus de femina, Virtutum confer semina.

Te decebat incarnari, Cui constat propriari Patris similitudinem, Quam homo atque angeli Appetendo, sunt scandali Passi vicissitudinem.

Hinc utrumque, pro te zelans Pater mox damnavit, velans Eis lucem clementiæ. Patrem cernens sic zelatum Pro te, cultumque privatum Debitæ reverentiæ, Ut honorem reparares, Ejus regnum restaurares, Es dignatus incarnari, Volens hominem salvari.

Quum paterni intellectus Sis clara emanatio, Hinc tum, quamvis sis perfectus, Quædam communicatio Tibi exstat cum homine Specialis, o Domine.

Homo nam ab intellectu Habet speciem effectu.

Ob id fieri hominem Decuit te imaginem Dei, cujus est imago Homo. Corde sim præsago.

Porro Personæ mediæ In divinis, egregie Ratio mediatoris Congruit et salvatoris.

Reconciliare Patrem, Itemque habere matrem, Plus competebat Filio, Sano constat consilio :

Ut qui Patrem sine matre Fuit habens ab æterno, Matrem quoque sine patre Esset habens in externo :

Quo propter nos humilior, Eo imitabilior, Dulcior, amabilior Et appretiabilior.

Nostra deificatio Sit tua incarnatio; Tua ima descensio, Nostra fiat ascensio; Tua summa dignatio, Sit nostra exaltatio.

Tibi hinc ac Patri sancto, Ac Paracletoque tanto, Jugiter regratiamur, Inflammamur, famulamur. Tribus honor et gloria, Qui lux una sunt propria.

Laus Dei de rationibus incarnationis.

Non valebat liberari Aptius et subtilius Homo, quam quod incarnari Volebas, Dei Filius.

Hoc in modo redimendi, Tua, Deus, miserendi

A Bonitas, sapientia, Æquitas et clementia, Caritas et potentia, Virtus, munificentia, Ostenduntur splendidius, Lucentque eminentius.

Rei nam difficillimæ Comperisti facillime Optimam solutionem, Tuam per cognitionem.

B Tua quoque justitia Culpam liquit non inultam; Pietas delens vitia, Est largita opem multam.

Distantia longissime Conjunxit propinquissime Tua omnipotentia; Se effudit largissime, Juvit fructuosissime Tua munificentia.

C Amor fuit plenissimus, Quod tu Deus altissimus Intime, propinquissime Conjunxisti dulcissime Temet nobis, personali Unione benignali.

Nulla fuit ad salvandum Hoc humanum genus digna Pura creatura : dandum Eras, Verbum. Tu nos signa.

D Tanta gratiæ dignitas Et gloriæ insignitas, Culpæ tanta impietas, Ac communicabilitas Tanta, Deus, est naturæ Tuæ majestas tam puræ, Gratiam ut reparare, Gloriam recuperare, Deoque satisfacere, In naturam sic agere, Nulli queat creaturæ Usque convenire puræ.

Sed, o tu Dei Filius, Quum te nil sit sublimius, Ad ista eras aptissimus, Prorsusque potentissimus.

Tibi per humanitatem Mereri, satisfacere, Porro per divinitatem Idoneitas agere, Ita, Christe, competebat, Sic salvare te decebat.

Ut a culpa actuali Itemque originali Emundemur, incarnatus Es pro nobis, et oblatus.

Et ut nobis elucescat Amor tuus, mens fervescat, Tuaque conversatio, Nostra sit informatio.

Fac nos incarnationis Tuæ fructum sortientes, Tuæ miserationis Dona grate conquirentes; Fac nos tibi, o Salvator, Semper gratos, legislator.

Hymnus, honor, munditia, Grates, splendor, lætitia, Tibi, beata Trinitas, Vera, simplex Divinitas.