Laus Dei ex epistola secunda pauli

ad Corinthios.

BENEDICTUS es, o Deus, Pater sancte Jesu Christi, Salus, virtus, plastes meus, Qui tam pie subvenisti.

Tu misericordiarum, Omnis consolationis Pater, dator gratiarum Puræque lætationis, Qui in omni consolaris Nos afflictu, ut testaris.

Sicut Christi passiones Sunt in nobis abundantes, Nostræ consolationes Sic per Christum sunt undantes.

In te solo confidimus : Idque, Deus, inquirimus,

Ut bona conscientia, Nostra exstet gaudentia; Ejus bona testatio, Nostra sit gloriatio.

Nos unxisti et signasti, Pignus Spiritus donasti. Nos in Christo triumphare, Per nos cunctis declarare Te, o Pater, condigneris. Semper intus opereris.

Hanc fiduciam habemus, Qui ex nobis nil valemus Agere meritorie, Nec cogitare proprie. Nostra sufficientia Ex tua est clementia.

Porro istam spem habentes, Confidentia utentes Sumus multa, o Salvator. Bonus odor, o Creator, Tuus simus nunc ubique, Nec agamus quid inique.

Tu spiritus es, Domine; Et ubi tuo nomine Est Paracletus, sincera Est libertas mentis vera jugo culpæ, dæmonum, Cœlestium fundus seminum.

Hæc servitus ingenua Tuo, Deus, sub præcepto : Quæ nobis sit congenea, Purgans omni ab inepto.

Da revelata facie Tuam, Deus, speculari Gloriam, ope gratiæ In eamdem transformari Imaginem a Spiritu Tuo, sancto adhibitu; Et nos duc a claritate Tuam in claritatem rate.

Qui dixisti splendescere

A

Splendorem de caligine, In nobis fac clarescere Lucem tuam, cœligene.

Thesaurum tui munerum Multorum ultra numerum, Habemus in fictilibus Vasis, istis fragilibus Carnibus, ut sublimitas Sit tua, o Divinitas.

B

Nunc mortificationem Tuam, per sectationem, O Christe, circumferamus, Ut in corpore ostendamus Vitam tuam, Rex cunctorum, Dominator dominorum.

Quamvis homo exterior Noster, Christe, fatigetur, Homo tamen interior Omni die renovetur.

C

Levis ac momentanea Hæc nostra tribulatio, Supra modum in patria (Ut vera credit ratio) Æternum pondus gloriæ Agit in nobis proprie, Dum terrena aspernamur, Et superna contemplamur.

Domum tu non manufactam, Æternalem et compactam, Nobis, Deus, præparasti, Et in cœlis adornasti, Ad quam pie suspiramus, Exsulantes hanc optamus.

D

Dum in corpore moramur, Heu! a te peregrinamur : Nam per fidem ambulamus, Non per speciem spectamus.

Tu pro cunctis es occisus, Ut qui vivunt, agant nisus Tibi non sibi vivere, Nec se a te dividere,

Christe, in quo Pater fuit Mundum liberans, qui ruit.

Nulli quam offensionem Demus per transgressionem, Ne nostrum ministerium Incurrat vituperium.

Nos in cunctis exhibentes Simus tibi obsequentes In multa patientia, Cum finali manentia.

Omni nos ab inquinamento Carnis atque mentis munda, Perfice nos ornamento Sanctitatis, et fecunda Nos timore filiali, Casto, sancto, perennali.

Ob nos factus es egenus, Dives exstans, Rex amœnus, Tua ut locupletaremur Paupertate, et salvemur Ejus merito, sumentes Dona tua ac tenentes.

Potes, Deus, abundantem Omnem in nobis gratiam Facere. Da æstuantem Caritatem ac latriam. Amas hilarem datorem, Celeremque solutorem.

In hac carne ambulantes, Carnee non militemus; Et qui sumus gloriantes, In te, Deus, exsultemus : Neque enim est probatus Laudans se, sed te laudatus.

Tu in cœlum rapuisti Paulum et in paradisum; Huic arcana ostendisti, Quæ non ad humanum visum Sive mentem licet fari. Dona nos te contemplari.

Pacis et dilectionis Deus, locum mansionis Facis in diligentibus Pacem hancque tenentibus.

Gratia, Unigenite, Tua, Pater ingenite, Fervens tua amatio, Tua et communicatio, Sancte Spiritus, nobiscum. Pravitatis tolle viscum.

Tuis ineffabilibus Donis, incessabilibus Gratibus regratiamur Tibi, Deus, quem miramur.

Tibi, beata Trinitas, etc.

Laus Dei ex epistola Pauli apostoli ad Galatas.

Te in mortem obtulisti Nostras culpas ob tollendas; Juxta Patris id fecisti Voluntatem. Nos accendas.

Tanta, Christe, sinceritas, Certitudo ac veritas Legis tuæ evangelicæ, Ut si angelus cœlice Sive Paulus loqueretur Contra hanc, id mentiretur.

Quærens homini placere, Tibi nequit complacere, Tuus esse et servus verus, Christe Jesu, rex sincerus.

Tu non accipis personam Hominis, hanc neque bonam Censes legis operibus, Legalium oneribus, Sed fide et Evangelio Salvas tuo mysterio.

Tibi cruci sum confixus : Vivo jam non ego, nixus

Tibi; sed tu in me vivis, Christe, et non alter quivis.

Sed in carne quod nunc vivo, Tua vivo fide, divo Jesu, qui me dilexisti, Teque pro me tradidisti.

Non sic stulti comprobemur, Ut in carne consummemur, Quum spiritu cœperimus : Nam tui sic non erimus ; Sed in bono inchoato Cum profectu nos servato.

Tu a legis maledicto Nos salvasti, cum invicto Corde factus maledictum Ob nos. Menti fer amictum.

Pater, omnes tui nati Sumus, mente renovati Per fidem Unigeniti Tui, nobis a te dediti.

Quum venisset plenitudo Temporis, hunc destinasti : Virginis hunc puritudo Peperit, quem subjectasti Legi, salvet ut legales. Tibi det nos filiales.

Quia sumus adoptivi Tui nati, Pater pie, Flamen sanctum tui vivi Nati immisisti die Lucis in nostris mentibus, Abba per hunc dicentibus.

Hinc amicus, proles, heres Tuus exstat Christianus, Nec ut servum hunc haberes, Si præberet tibi manus.

Bonum semper æmulemur, Et te Christum amplexemur, In quo nec circumcisio Quid valet nec præputium,

Sed fides, ut suspicio, Et caritas, nec dubium.

Nunc aufer carnis opera, Nosque implere propera Fructibus Sancti Spiritus. His orna nos divinitus : Caritate, mititate, Gaudio, patientia, Castitate, bonitate, Pace et continentia.

Vanam gloriam spernamus, Nemini invideamus, Invicem non provocemus, Lapsum pie reformemus, Et nos ipsos contemplemur, Ne et ipsi nos tentemur.

Da carnem crucifigere, Culpas, concupiscentias; Proximum non affligere, Verum deficientias Ejus ferre ac onera. Nostra spernamus opera.

Spiritu da seminare, Et interne ambulare, Semper nos humiliare Et ut nihil reputare, Æternalem ut metamus Vitam, et te diligamus.

Quum est tempus operemur Bona cunctis, plus credenti; Nec in quoquam gloriemur Quam in cruce ac pendenti.

Per quem nobis crucifixus Mundus, et nos mundo, Tibi semper sim innixus, Summo Christo præfecundo.

Stigmata tua, Domine, Te sequens, tuo nomine Corpore in meo jugiter Portem vere salubriter.

Tibi, beata Trinitas, etc.