Laus Dei ex evangelio, de Christi resurrectione

A passione tertia Die, absque inertia Sanctæ feminæ venerunt, Quæ te dire deplanxerunt, Corpus tuum perungere, Et se defuncto jungere.

Angelus his apparuit, Te surgentem non tacuit : Cujus metu sunt prostrati Milites condeputati, Et effecti ut defuncti, Non per fidem Deo juncti.

Angelo hoc descendente, Et ut fulgur apparente, Niveis tecto vestibus, Viribus mox cœlestibus Terra motum est perpessa. In te mens sit indefessa.

Feminis tunc consternatis, Vultu terræ inclinatis, Duo angeli adstabant, Eas de te informabant.

At Maria Magdalena Propter te dolore plena Duos angelos adspexit, In speluncam quum inspexit.

Surgens primo ostendisti Te Mariæ Magdalene; Feminis post occurristi, Has salutans tam serene.

Nuntiarunt principibus Milites quæ contigerunt, Qui hos donis supplicibus Ad testandum induxerunt, Quod ipsis dormientibus Neque istud scientibus, Corpus tuum clam tulerunt Tui, tibi qui hæserunt.

Die isto ostendisti In alia effigie Te duobus, his coisti Peracta jam meridie. Tunc eisdem loquebaris : Oportebat Christum pati. Et cum eis vescebaris : Sic fuerunt inflammati.

Post hæc, te monstrans facie Disparensque ab acie, Undecim apparuisti, Thoma die hoc absente; Te palpandum præbuisti, Cum eisdem te edente.

Pati, mori oportebat Te Christum et resurgere; Prædicari condecebat In te, tuosque currere Ubique pœnitentiam Docendo, indulgentiam.

Tunc per insufflationem Sanctum Spiritum dedisti, Et per hanc infusionem Potestatem contulisti Tuis culpas remittendi Quibus par, et retinendi.

At post dies octo rursus Tuis te ostendens, cursus Horum tunc lætificasti; Cum his Thomam visitasti, Manus pedesque palpanda Præbens ei, vis miranda : Beati qui non viderunt, Inquiens, et crediderunt.

Ad mare Tiberiadis, Distinguens res periodis, Te discipulis monstrasti Septem, quos et informasti.

Subito tunc concluserunt Centum quinquaginta pisces Et tres magnos, quos ceperunt Te agente, quum jussisses.

Tunc ter Petrum sciscitatus, Christe, es, an te amaret : Qui a te est deputatus Oves tuas ut curaret.

Tecum, Christe, consurgamus Vere semper mentaliter, Et divina exspectemus Nunc sapientialiter.

Tibi, beata Trinitas, etc.