Laus Dei ex secunda pauli ad timotheum

epistola.

SPIRITUM non præstitisti Nobis servilis timoris, Sed virtutis: infudisti Tui spiritum amoris, Veræque sobrietatis, Deus, auctor pietatis, Ut mentis promptitudine, Virtutum plenitudine, Serviamus piissime Tibi ac devotissime.

Christe, non erubescamus Hic tuum testimonium, Sed secure te promamus. Ad cœli nos duc solium.

Per te Pater nos vocavit Gratia tua, haud merito Nostro: qui præordinavit Ab æterno non edito In te conferre gratiam Nobis, lucisque patriam.

Mortem, Christe, destruxisti, Vitam veram reddidisti. Si tibi nunc commorimur, Gratiose convivemus, Ut si digne compatimur, Gloriose conregnemus.

Fac nos, Pater, laborare Ut bonos Christi milites; Non nos sinas implicare

Rebus mundi præcipites, Sed in cunctis intellectum Præsta nobis, et cor rectum.

Tibi nos exhibeamus Probatos operarios; Veritatis assumamus Sermones necessarios; Recti, inconfusibiles Simus ac dirigibiles.

Verba vana et profana Devitemus mente sana; Nunquam verbis contendamus, Et affectus fugiamus Pueriles atque viles. Tuus, o Christe, sim miles.

Servum tuum litigare Non est decens, Jesu care, Sed mansuetum et docilem Patientemque sobolem, Et modeste arguentem Veritati resistentem.

Volentes pie vivere In te, Christe, suscipere Decet persecutiones Tanquam tuas dationes, Et has ferre glorianter, Teque sequi æstuanter.

Da prælatis prædicare Verbum tuum, opportune Vigilanterque instare, Etiam et importune, Increpando patienter, Obsecrando diligenter.

Tibi, beata Trinitas, etc.