Laus Dei ex canonica judæ

PLEBEM, Jesu, eduxisti De Ægypto, perdidisti Non credentes; qui ruentes Angelos superbientes In judicium servasti Dei, vinculis ligasti Æternis sub caligine, Qui fuissent cœligenæ.

Gomorrha atque Sodoma, Pravitate synonyma, Sunt exemplum constitutæ, Ignis æterni virtute Tua pœnam sustinentes, Et submersæ, non patentes.

Viam Cain assecutis, Culpam Balaam indutis Coreque rebellionem Parasti damnationem. Nam procella tenebrarum Harum est creaturarum Pravitati conservata, In æternumque parata.

Multis Sanctorum millibus Gloriosis, humilibus, Stipatus, ad judicium,

Qui odis omne vitium, Venies, ad arguendum Impios ac puniendum.

Nos a murmuratoribus, Et carnis secutoribus Querulosisque secerne, Deus clemens et æterne.

A semet dividentibus, Spiritum non habentibus, Itemque animalibus, Sejunge nos a talibus.

Et fidei sanctissimæ Nos superædificemus ; Te Deum devotissime Sancto Spiritu oremus ; In ferventi caritate Persistamus illibate.

Proximis misereamur, Tuo in timore figamur, Odientes maculatam Carnis tunicam, fœdatam.

Potens es nos conservare Absque culpa, et locare In lucis tuæ gloria Prædulci, amatoria.

Tibi, beata Trinitas, etc.