Laus Dei ex apocalypsi joannis apostoli

DA, Deus, pacem, gratiam Tuam nobis multifariam, Qui es, eras, et qui eris : Tu æternus honoreris.

Christe, testis es fidelis, Primitivus mortuorum, Princeps regum ens in cœlis, Reformator perditorum.

Tuo sanguine lavisti Nos a culpis, et fecisti Regnum et sacerdotes Deo nostro : cuncta potes.

En venies cum nubibus, Cum supernis virtutibus; Omnes te videntes erunt, Et hi qui te pupugerunt.

Omnes tribus terræ flebunt Super te se, et mœrebunt, O finis et principium, et Ω, Rex, initium, Tunc omnipotens futurus, Cuncta justa discreturus.

Tu primus et novissimus, Christe; vivus, qui defunctus

Eras ut indignissimus, Et nunc Patri es conjunctus.

In sæcula sæculorum Vivens, felix Rex cunctorum, Claves mortis et inferni Habes, regni dux superni.

Vincenti dabis edere De ligno vitæ tenere, Quod in paradiso Dei Est. Sis, Christe, memor mei.

Usque mortem fac fideles Nos, o Deus, ut reveles Mentes nostras in patria Tua perfecta gratia, Et æternæ vitæ bonam Sortiamur tunc coronam.

Nulla quæ pro æquitate Patiemur metuamus : Nam qui vincit timorate, Non lædetur, ut speramus, secunda, Deus, morte, Non peribit prava sorte.

Tu occultum manna dabis Superanti, et ornabis Hunc candenti margarita, In qua nomen scriptum ita Erit, ut id non noverit, Quam qui capere poterit.

Renes cordaque scrutaris, Cunctis dare commendaris, Deus, quidquid meruerunt, Prout coram te vixerunt.

Porro digne triumphanti Et in finem firme stanti, Potestatem condonabis Super gentes, et ornabis Eum matutina stella. Tua sit mens mea cella.

Effice nos vigilantes, Nostrosque plenificantes

Actus coram te, Creator; Qualiter acceperimus, Jugiter meminerimus Impleamusque, Salvator.

Vincentem albis vesties; Neque hunc de libro vitæ Delebis, nec hunc nescies, Imo tuum dices rite.

Habes, Christe, sanctus, verus, Clavem David, Rex sincerus : Claudis, et nemo aperit; Aperis, et nemo claudit, Si manus reseraverit Tua. Me cor tuum audit.

Superantem, in tuo templo Tu columnam das exemplo, Super hunc tuum nomen scribens, Ut sit fontem vitæ bibens, Et de cœlo descendentis Jerusalem, te videntis.

Testis tu fidelis, verus, Christe, rerum principium; O amator noster verus, Ablue omne vitium.

Aurum probatum ignitum, Amorem, sapientiam Da, et cor a te fulcitum, Fer mentis opulentiam.

Nos paterne et benigne Nunc castiga, Pater digne, Qui quos amas, hic arguis, Corrigis et redarguis.

Tu ad ostium stans mentis, Pulsans instar diligentis, Intras ad aperientem, Cœnas secum, non torpentem.

Das vincenti residere Tecum, Christe, tuo throno, Sicut tu vicisti vere, Sedens nunc cum Patre bono,

Throno ejus in æterno. Loca tu nos in superno.

At Beati, benedicte Deus, semper laudant sic te : Sanctus, Sanctus, Sanctus, Deus Dominator omnipotens, Qui erat et est Rex meus, Qui veniet cunctipotens.

Dignus es, Deus Domine, Altior omni homine, Virtutem, laudem propriam [Et honorem et gloriam] Habere et accipere; Nec debet quis præripere : Sicut hæc nam tu creasti Cuncta, sponte et formasti.

Summe Leo tribus Judæ, Tu vicisti prorsus nude, Radix David, reserare Dignus librum, et laxare Septem ejus signacula, Cognoscendi obstacula.

Nam occisus redemisti Nos cruore tuo Deo, Pretiose nos emisti, Grates tibi Regi meo.

Tibi millia millium Angelorum humilium Laudem dicunt summo Christo, Teque laudant hymno isto :

Dignus Agnus est occisus, Pro salute mundi nisus, Sumere divinitatem, Gloriam et potestatem, Virtutem, sapientiam, Laudem et reverentiam.

Salus Deo qui in throno Sedet, atque Agno bono. Te angeli glorificant, Procidentes hymnificant : Splendor, benedicentia,

Gratitas, sapientia, Honor, virtus, fortitudo, Deo semper plenitudo.

Terges tu ab electorum Oculis omnem flentiam; Non famescet quis eorum, Nec ferent sitientiam, Neque æstu affligentur, Fonti vitæ adducentur.

Salus, virtus, regnum Dei Nunc est factum, Regis mei, Et potestas Christi ejus; Non credenti hæc, quod pejus.

Magna et mirabilia Opera tua, Domine: Sunt nam inscrutabilia Ab omni prorsus homine.

Tuæ viæ justæ, veræ, Rex Sanctorum præsincere. Quis te non magnificabit? Et quis te non formidabit?

Scriptum tuo vestimento, Mentis sanctæ indumento, Æternali ex fœdere Habes, Christe, ac femore: Rex regum, dominantium Dominator, regnantium Regum rex, ac dominorum Dominus universorum.

Hi beati qui vocati Sunt ad cœnam nuptiarum, Christe, tui, hi sunt grati Tibi fonti gratiarum.

Ut tuam iram evadere Possint perversi, cadere Montes, petras affectabunt Super se, nec impetrabunt.

Christe summæ majestatis, Sitienti dabis gratis Tu de fonte aquæ vitæ: Mentes nostras imple rite.

Servi tui obsequentur Tibi, Deus, et fruentur Vultu tuo, quem videbunt. In æternum sic manebunt.

Tibi, beata Trinitas, etc.

Laus Dei de creationis opere.

CREASTI in principio Cœlum, terram, summe Deus: Nam tu, Pater, in Filio Hæc fecisti, Factor meus.

In temporis initio, Ex æterno consilio, Abs prævia materia Cuncta agens, interea Sapienter produxisti Cuncta invisibilia, Angelosque distinxisti Per agmina agilia.

Orbes astraque cœlorum, Ordinem elementorum, Mixta, rationalia Et irrationalia Es molitus, non sortitus Opem, tua vi fulcitus.

Hominem inter angelos Et terrena condidisti Medium, quem per angulos Terræ vastæ dispersisti.

Nos gratos beneficio, Deus, fac creationis, Purgatos omni vitio In supernis pone thronis.

Tibi, beata Trinitas, etc.

Laus Dei de opere distinctionis et ornatus.

UNIVERSIS creaturis, Cunctis rerum tu naturis

Vires certas indidisti, Et virtutes impressisti.

Tu cœlorum decorasti Orbes ac pulchrificasti Sole, luna et planetis, Astris multis visu lætis.

Aerem volatilibus, Terram brutis, hominibus, Aquas piscibus ornasti ; Cuncta apte decorasti.

Te jubente fert virentem Herbam terra redolentem, Arbores, flores, species, Reparans hæc millesies.

Porro corruptibilibus Vim gignendi contulisti : Sic indestructibilibus, Deus, hæc coextendisti.

Formas innumerabiles Maris piscium fecisti, Species admirabiles Bestiarum produxisti, Gryphes, elephantos, cete Es molitus, agens læte.

At rebus non viventibus Miras vires impressisti, Ratione utentibus Eas, Deus, subjecisti. Fac nos eis utiliter Uti atque feliciter.

Tibi, beata Trinitas, etc.