Laus Dei de cherubim

Post ordinem seraphicum, Ponis chorum hierarchicum Cherubim sanctissimorum, Animorum excelsorum, Quos sublimi scientia Ornas cum eminentia.

Thesauros sapientiæ Splendoresque scientiæ, His infundis copiose, Sic quod ipsi luminose Fundunt choris sequentibus De his donis fulgentibus.

Mentes istæ sunt sortitæ te, Deus, princeps vitæ, Vim præclare cognitivam, Divinorum inspectivam Mysteriorum, capacem Summæ illustrationis, Et ejusdem perferacem Mentibus secutionis.

Fulgent, te irradiante, Luce mire coruscante Venustate veritatis Et candore sanctitatis, Te cernentes subtiliter Et inavertibiliter.

Tua contemplatione Nostrum imple intellectum, Et tam fixa unctione, Deus, eum fac perfectum, Ut non cesses residere In hoc ipso et splendere.

Tibi, beata Trinitas, etc.