Laus Dei de thronis

O Deus supersapiens, Quem nulla mens est capiens, Post hæc Thronos statuisti, Quos liberrimos egisti Ab indigna servitute Et subjectione tute, Elevatu eximio, Alto gaudent dominio.

Circa te sunt collocati, Tota vi ad te levati, Et tuæ insidentiæ Ac supervenientiæ Eminenter sunt capaces, Mansionis tuæ tenaces.

Dicuntur nam Deiferi, Grandi luce clariferi, Aperti singulariter Ad te sumendum taliter.

In his consistorio Sedes judicatorio, Per hos tua judicia Decernens mirabilia.

Sedes sunt pacatissimæ, Summe tranquillissimæ, Mira uniformitate Tibi, Deus, præparatæ.

Per te causas veritatis Sunt, Rex regum, discernentes, Censuras æquitatis Per te, Judex, exprimentes. Instar horum nostras mentes Tibi sedes fac fulgentes.

Tibi, beata Trinitas, etc.

Laus Dei de Dominationibus.

SANCTAS Dominationes, Per cœlestes stationes, Media in hierarchia Summas ponis, Thearchia.

Effecisti has immunes subjectu indecente; Bonitate sunt communes, Omni choro prosequente.

Quum jubere dominorum Exstet, agant quod subjecti, Animorum est istorum, Deus, ordinis fons recti, Spiritibus sequentibus Quod agant distribuere, Et de creatis entibus Eosdem et instruere.

Mentes hæ supermundanæ Sursumaguntur non vane Ad te principem luminis,

Ad lucem tui numinis, hierarchiæ mentibus His prime influentibus.

Nulla usquam vi premuntur; Dominatum sortiuntur Eminentem ad phalangas Subsequentes. Tu nos tangas.

Veram his præsidentiam Das, qua per appetentiam Amorosam sunt reflexi Ad te fontem dominatus : Tota mente sunt connexi Sine fastu imperatus.

Ordinum sunt conversivæ Subditorum ad te Deum, Et eorum perfectivæ. Cum his præsta jubilæum.

O dominator Domine, Hæ mentes tuo nomine Se inclinant, te adorant, Sicque se in te decorant.

Singulari libertate Sunt extentæ in te grate. Inter heroas nobiles Aulæ tuæ immobiles Altum agunt humiliter Dominium agiliter.

Deus sancte, immortalis, Fortis et clementialis, Dæmoni sic dominari, Mundo, carni principari Fac nos, ut hinc copulemur Choro huic, et salvemur.

Tibi, beata Trinitas, etc.

Laus Dei de ordine Virtutum.

CHORO Dominationum, Virtutum nectis ordinem, Quibus das ad actionum Suarum per te cardinem

Promptam exsecutionem, Miram confortationem.

Hinc in nullo infirmantur Ad divina sortienda, Inconcusse elevantur Ad te tuaque agenda.

Ordines posteriores, Tuos, Deus, ad splendores Levant, tibi conformantes Hos plus, ac deificantes.

Jussa Dominationum Mandant exsecutioni, Et mirarum actionum Vacant perpetrationi.

Imbecilles nos egenos, Deus, firma, fac serenos.

Tibi, beata Trinitas, etc.