Laus Dei de ordine archangelorum

His, Creator benedicte, Archangelos substituis : Quos, o Deus, Rex invicte, Nuntios constituis Grandium negotiorum, Operum præcipuorum.

Hos illustrant Principatus ; Puros habent affectatus, Ut cum his ad te vertantur, Deiformesque reddantur.

Illustras, Deus, Angelos Per beatos Archangelos, Qui per illos hominibus Quædam pandunt luminibus.

Inter istos Gabrielem Scimus, qui Emmanuelem Te, o Christe, nuntiavit Virgini, quam informavit.

Hic fidei mysteria Per divina imperia In utroque Testamento Declaravit documento.

Merito hunc adamamus, Ac præclare honoramus : Cujus prece adjuvemur, In æternumque salvemur.

Tibi, beata Trinitas, etc.