Laus Dei de gradibus hominum

electorum in patria.

DEUS simplex, trinus, unus, quo fluit omne munus, Anima Christi clarius Te cunctis videt, carius Te diligit, ardentius, Præ cunctis vehementius.

Hinc copioso lumine De sua plenitudine Cunctis fundit agminibus Angelorum et hominum, Altior in numinibus Erecta, per te Dominum.

Post hanc Virgo Christifera Universis est prælata, Magis facta Deifera, Plus in Deum profundata,

In abyssum tuæ lucis Plus absorpta, Mater Ducis.

Patriarchæ et Prophetæ Te conspectant nimis læte, Chorusque Apostolorum Cum excessu gaudiorum Te adstringunt, te fruuntur, In te prorsus resolvuntur.

Martyres victoriosi Te collaudant gaudiosi, Viventes beatissime In te, Deus dulcissime.

Luciformes confessores, Puri tui sunt inspectores.

Te ordo venerabilis Monachorum spectabilis, Singulari libertate, Deus, possidet beate, Pro quo suam voluntatem Fregit, sprevit libertatem.

Doctores facialiter Te, Sancte, æternaliter Jam conspectant prægaudenter, Ut credebant confidenter.

Te virgines mundissimæ Laudant præsuavissime, Purissimis amplexibus Te stringunt mentis nexibus.

Ex angelis, hominibus, Unam facis Ecclesiam In supernis luminibus, Unanimem, egregiam, Ad cunctos angelicorum Ordinum quosdam homines Levans, juxta meritorum Cujusque exigentias.

Sic nunc, Deus, conversemur, Ut post istis copulemur.

Tibi, beata Trinitas, etc.