Laus Dei de impressionibus aeris

MULTIFORMES tu effectus Agis, summe Intellectus, Aeris in elemento. Nobis sis pro firmamento.

Nubes et impressiones, Ventos, exhalationes Pluviasque hic producis, Sempiternæ Princeps lucis.

Operis cœlum nubibus; Fulges mire fulguribus; Tonitrua efficiens, Nos metu es dejiciens.

Aquas ligas seriatim In nubibus subtiliter, Et emittis has guttatim, Providendo utiliter, Pariter ne erumpentes, Cuncta exstent subvertentes.

At per causas naturales Secundas, instrumentales, Varias impressiones Facis et influxiones :

Ut cometas et halonem, Asub, volantem draconem, Coronas et voraginem, Multiformem propaginem, Grandinem, nivem, iridem, Pruinam et caliginem, Stellas insuper cadentes, Capras quoque salientes.

Omnis lapis pretiosus, Omnis liquor fructuosus, Quidquid exstat optabile, Tuum opus est amabile.

Tu irrationalibus Dedisti animalibus Mirandas proprietates, Actus, formas, potestates, Naturales industrias, Secretasque astutias.

Te in cunctis operibus Tuis pure contemplemur, Totis mentis visceribus Sic tuo amore inflammemur, Et ex cunctis inducamur Venerari te quem famur.

Tibi, beata Trinitas, etc.