Articulus 49

Quemadmodum de naturali beatitudine humanæ animæ Plato senserit.

PORRO, dum mundanæ molitionis fundamenta constituisset opifex Deus, juxta traditionem Platonis, animas singulas supra compares stellas statuit, quatenus dii deorum singulis corporibus secundum ipsorum merita formas infunderent: quoniam primus actor orbibus et sideribus hujus mundi generationem gubernationemque commisit, dicente Platone: Dii deorum, quorum opifex et pater ego. Horum sementem faciam vobisque tradam; vestrum autem exsequi par erit. Unde omnes animas, etiam brutorum, posuit immortales.

Propter quod inducit Plato summum Deum loquentem ad deos, quatenus pignora quæ corporibus communicaverint, post dissolutionem resumant. Hæc autem in Phædone et Timæo diffuse traduntur a Platone.

Nunc autem in tantum dicatur, quod animas hujus mundi dixit a comparibus stellis descendere; et eas quæ in prima incorporatione justitiam coluerunt, dixit ad stellarum contubernia reverti, illicque bono separato et intellectuali uniri et in hoc felicitari, prout videlicet illuminationem suscipiunt et formarum intelligibilium immissionem ab idealibus formis: quarum intelligibili participatione dixit omnem participatum intellectum, intelligentem fieri. Injustas denuo animas dixit transcorporari, donec purgatæ, ad sidereas mansiones redire possent. Animas quippe non intellectuales transcorporari dixit secundum vicissitudinem et indigentiam generationis et materiæ. Enimvero, post temporum intervalla dixit sanctas animas rursus corporibus delectari, illisque velle infundi, eo quod intellectualitas non sit in ipsis sincera, sed inclinationi ad materiam et corporales concupiscentias quodammodo obnoxia. Per talem nempe ascensum et descensum animarum generationem in entibus perpetuavit. Verumtamen omnes hujus mundi formas a formis separatis dicebat effluere, quemadmodum procedit forma ceræ a forma sigilli; sed quasdam separabiliter, quasdam vero inseparabiliter dixit participari a materia; et quidem immortales dixit ascendere et descendere secundum interminabilem periodum, quæ¹....