Articulus 45
Passionis Domini septem effectus ostenduntur.
DOMINUS. — Quia, ut asseris, placet tibi passionis meæ iter ad ascendendum in contemplationis montem, dicam tibi aliqua de ipsius passionis meæ efficacia perutili, ut tanto ad eam ferveas amplius, quanto sentis fructum ejus plenius.
DISCIPULUS. — Eia, gratias tibi, bone Domine, quia tam misericorditer cupis meum profectum. Loquere ad cor servuli tui indigni.
DOMINUS. — Effectus passionis meæ est pretiosus, multus et magnus. Hoc poteris hinc perpendere, quia per passionis meæ operationem mundo septem magnalia innotuerunt, quæ suis cum conditionibus ipsum prius latuerant, videlicet: Deus admirabilis, spiritus intelligibilis, mundus sensibilis, paradisus desiderabilis, infernus horribilis, virtus laudabilis, et reatus culpabilis. Hæc septem magnalia figurata erant per septem signacula signati libri quem Joannes, meus amicus et evangelista, vidit in sua Apocalypsi in spiritu.1 Quem librum aperire, ejusque signacula solvere, nemo poterat in cœlo et in terra, nisi Agnus immaculatus, qui in cruce occisus est.2
Vide ergo primum diligenter quomodo in passione mea mirabiliter divina sapientia diabolum decepit, justitia Dei pretium redemptionis quæsivit, et misericordia Dei Filium pro reis tradidit. Adverte etiam sollicite quomodo per passionem meam manifestata est triplicis spiritus conditio, utpote: angelorum benignitas, quia Dominum suum permiserunt crucifigi; hominum dignitas, quia propter eos Dei Filius mori dignatus est; et dæmonum crudelitas, quia suum et omnium Creatorem crucifigi per suggestiones ex invidia procurarunt. Considera etiam quomodo in passione mea apparuit mundi cæcitas, qui lucem veram cognoscere noluit, diligendo magis tenebras;3 mundi sterilitas, quia summum bonum sibi oblatum voluit potius contemnere quam acceptare; et mundi impietas, quia innocentissimum maluit morte turpissima condemnare quam venerari. Attende quoque quomodo per meam passionem sunt apertæ paradisi portæ, quæ per originale peccatum clausæ erant. Hujus paradisi deliciis (ubi est plenitudo gloriæ, lætitiæ et opulentiæ) ut tu possis perfrui, factus sum ego propter te in passione mea sponte vilis, pauper et miserabilis. Perpende denique fideliter quomodo ex mea passione manifestatum est quam horrendæ sunt inferni miseriæ, et quod ipse infernus plenus est egestate, vilitate et calamitate: a quibus ut te eruerem, libertati te redderem et cœlestibus civibus reconciliarem, mortem pro te subii, meosque redemi, sed ingrati et infideles ut illic perpetuo puniantur decrevi. Potes quoque ex mea passione intelligere quam laudabilis sit virtus: quia pretiosa, nam antequam ego vellem virtutem obedientiæ in me non exhibere, elegi magis mori quam vivere; speciosa, nam virtus patientiæ etsi in me ubique, maxime tamen relucebat in mea passione; fructuosa, quia uno perfecto virtutis actu ego spoliavi infernum, aperui cœlum, et recuperavi deperditum. Intuere etiam prudenter quomodo per passionem meam claret quantæ maledictionis sit peccatum, in quo diluendo fuit tanta difficultas: quia indiguit tam magno pretio, tam grandi sacrificio et tam nobili medicamento, puta Unigeniti Dei immolatione, Filii Virginis crucifixione, et tam pretiosi sanguinis immaculati Agni unctione.
DISCIPULUS. — O Agnus Dei, qui solus potuisti librum septem signaculis signatum aperire, et mysteria divina in eo latentia per tuam sacrosanctam passionem reserare, fac me indignum peccatorem tibi pro tanta tua caritate quam mihi in tua hac beatifica exhibuisti passione, ita devotum et gratum, ut ejusdem venerandæ passionis tuæ virtute illustrationem intellectus cum inflammatione affectus, in tantum quantum pro tua fuerit laude meaque salute et pro aliorum in tui nominis gloriam ædificatione, merear percipere misericorditer. Amen.
Footnotes
Chapter 46 of 52