Articulus 10

De annuntiatione gloriosæ facta Puellæ.

ENIMVERO, jam nunc instante ab æterno disposita hora, missurus in mundum hunc Unigenitum suum summus Genitor, superadorandæ superviventisque Trinitatis clementiale consilium felicissimæ insinuare volens Puellæ, Archangelum ei mittit, quatenus eam celeberrime salutet, Deique ei Unigeniti incarnationem in ea et item ex ea complendam revelet.¹

Jam ergo ausculta, Maria, adverte, o benedicta, agnosce quid de te sentiat, qualem te existimet Deus excelsus, Judex infallibilis. Mittit equidem tibi suum Unigenitum, quem utique non minus diligit quam se ipsum. Denique dat tibi Filium quem ex proprio corde sibi æque bonum itemque consubstantialem produxit. Hunc tibi committit, o incomparabilis amantissimaque Maria, ut eum in utero alas, genitum lactes et foveas, contrectes et ad incrementum usque perducas. Offert tibi magna, o dignissima sponsa. Numquid hæc, o Domina, sapientissimus ille Pater perageret, nisi te idoneam dignamque censeret? Nobile tibi pignus credit, tecumque fiducialiter facit.

Hæc est hora ab æterno præordinata, Patriarchis promissa, Vatibus prædicta, totique orbi desiderabilissima. Descendit mox angelus, Virgunculam salutat, pudicissimam honestissimamque Puellam jucundissimo veneratur eulogio : Ave (inquiens), gratia plena, Dominus tecum, benedicta tu in mulieribus.

A sæculo non est talis audita a supernis salutatio.² Gedeoni dictum est : Dominus tecum, virorum fortissime. Sed numquid, Gratia plenus, aut, Inter viros benedictus ? Quomodo enim gratia plenus exstitit, qui in fide vacillans, Deumque tentans, signum expetiit ?³ Porro, qualiter inter viros benedictus, qui contra legem operans, in sui suæque domus scandalum atque ruinam sacerdotale sibi ephod effecit ?⁴⁵⁶ Denique, sancto David testimonium perhibens Deus : Inveni (ait) David filium Jesse, virum secundum cor meum.⁷ Verumtamen adulterium homicidiumque vir ille illapsus est. Demum de Salomone loquens Deus :

Ero (asserit) illi in patrem, et ipse erit mihi in filium.⁸⁹ Et tamen effeminatus idololatraque est iste effectus. Sed tu, o

Maria, gratia plena salutaris ; sed vehementius replenda es, nec unquam a gratiæ plenitudine peccando excides. Insuper Dominus tecum ; sed specialiter nimis : tu quippe ipsius amica, tu sponsa, tu filia, tu thesaurus ejus ;¹⁰ et scimus quia ubi thesaurus Dei, illic et cor ipsius. Dominus ergo tecum in intellectu, per veram sapientiam ; in affectu, per ardentissimam caritatem ; in memoria, per stabilem sincerissimamque inhæsionem. Ecce non dormitabit neque dormiet qui custodit te, o felicissima.¹¹ Aures namque ejus votis tuis intentæ, et oculi quoque ipsius aperti super te sunt die ac nocte.¹²

Footnotes

1. Luc. I, 36 et seq. ↩

2. Iudic. vi, 12. ↩

3. Ibid. 17. ↩

4. Ps. lxxxviii, 21; ↩

5. II Reg. ii, 4-17. ↩

6. II Reg. viii, 27. ↩

7. Act. xiii, 22. ↩

8. II Reg. vii, 14; ↩

9. III Reg. xi, 1-8. ↩

10. Matth. vi, 21. ↩

11. Ps. cxx, 4. ↩

12. II Par. vi, 40. ↩