Skip to the text
Ember
PT

Articulus 66

Excitatio cordis ad appetendum incessabiliter ac ferventer beatitudinem æternalem.

SERVI Dei servient illi, et videbunt faciem ejus, et nomen ejus scriptum in frontibus eorum, et regnabunt in sæcula sæculorum. Apoc. XXII, 3-5.

Quare tristis es, o anima? Spera in Deo, quoniam adhuc confitebor illi, qui est salutare vultus mei et Deus meus, qui est Deus, objectum, causa et fons totius salutis meæ. Et nunc, o anima mea, quare mœrore consumeris? Numquid rex et salvator, adjutor et consolator non est tibi, aut consiliarius tuus periit, quia comprehendit te dolor? Audi dicentem, consulentem et exhortantem: Invoca me in die tribulationis; eruam te, et honorificabis me. An non credis promittenti qui ait : Quoniam in me speravit, liberabo eum ; protegam eum, quoniam cognovit nomen meum; clamavit ad me, et exaudiam eum ; cum ipso sum in tribulatione, eripiam eum et glorificabo eum, longitudine dierum replebo eum et ostendam illi salutare meum? Nonne summa et infallibilis Veritas ait, Omnis qui petit accipit, et qui quærit invenit, et pulsanti aperietur?1 Sed adverte et imple quod hæc ipsa Veritas iterum loquitur: Oportet semper orare et non deficere; et rursus: Ora Patrem tuum in abscondito;2 itemque: Spiritus est Deus, et eos qui adorant eum, in spiritu et veritate adorare oportet, hoc est cum interna mentis recollectione ac diligenti attentione atque in vera devotione, aut saltem cum proposito et conatu vitandi omne peccatum:34 peccatores enim in proposito peccandi manentes Deus non audit.5 Propter quod Filius Dei dixit: Non omnis qui dicit mihi, Domine, Domine, intrabit in regnum cœlorum, sed qui facit voluntatem Patris mei qui in cœlis est.6

Non te conturbet adversitas, neque tentatio te contristet: imo omne gaudium existima quum in varias tentationes incideris7, sciens quod probatio fidei tuæ patientiam operatur, hoc est, ad patientiam te exercet;8 patientia autem opus perfectum habet, ut sis perfecta et integra, in nullo deficiens. Audi Patrem cœlestem te dulciter consolantem: Ego quos amo, arguo et castigo. Ignoras quod per multas tribulationes oporteat te intrare in regnum cœlorum, et quod omnes qui volunt pie vivere in Christo, persecutionem patientur?910 Nonne ipsummet Christum, Dei Filium, oportuit pati, et ita intrare in gloriam suam ?1112 Nonne hic mundus et terra peregrinationis istius est vallis lacrimarum, locus exsilii et carcer, non patria electorum? Nescis quod beati sunt qui lugent, væ autem ridentibus? Nonne offendisti Deum in multis, et quotidie sæpe offendis eum, qui peccata non patitur abire inulta?1314 Flagella igitur Domini patienter gratanterque suscipe, et ea ad tuam emendationem, non ad tuam perditionem provenisse, cum pœnitentia et humilitate jugiter recognosce.15 Itaque communicans passionibus Christi gaude, quatenus in revelatione gloriæ ejus gaudeas, et cum ipso æternaliter glorieris:16 quoniam quod est honoris et gloriæ ac virtutis Dei, super te requiescet, si nunc in omni adversitate patiens fueris. In Deo æternaliter exsultabis, si nunc modicum oportet contristari in variis tribulationibus, ut probatio fidei tuæ multo pretiosior sit auro.17 Qui enim humilis et patiens fuerit, erit in gloria.18

Benedic Deo, qui secundum misericordiam suam magnam regeneravit te in spem vivam, ut consequaris atque possideas hereditatem incorruptibilem, incontaminatam, immarcescibilem, tibi in cœlo paratam, in qua exsultabis lætitia inenarabili.19 Tunc videbis et afflues, et mirabitur et dilatabitur cor tuum, et præ plenitudine gloriæ te ipsam capere vix valebis.20 Tunc gaudens gaudebis in Domino, et exsultabit mens tua in Deo salutari21 tuo, quum fecerit tibi tam magna Deus omnipotens, quando induerit te vestimento salutis, et adimpleverit te jucunditate cum vultu suo.2223

In horum consideratione et spe lauda Deum tuum, o filia Sion, exsulta in toto corde tuo, filia Jerusalem, quia Dominus rex in medio tui est ut salvet te in æternum, nec ultra timebis malum.2425 Lætare in his quæ dico tibi, quia in domum Domini ibis, et in domum non manufactam, æternam in cœlis;26 in qua id quod in præsenti est momentaneum et leve tribulationis tuæ, operabitur in te æternum pondus gloriæ infinitæ.2728 Idcirco exspecta Dominum, viriliter age, et quidquid potest manus tua infatigabiliter age, quoniam labor tuus non erit inanis in Domino, eritque merces, et merces copiosissima, finem non habitura, operi tuo.29 Bonorum etenim operum gloriosus est fructus. Mensuram bonam et confertam et coagitatam et supereffluentem dabit Dominus et Salvator tuus in sinum tuum.303132

Noli diligere mundum et ea quæ mundi sunt. Non enim hic habes manentem civitatem, sed futuram inquiris, de qua ait vir sanctus:333435 Gloriosa dicta sunt de te, civitas Dei; sicut lætantium omnium habitatio est in te.36 Exspecta igitur civitatem fundamenta habentem, cujus artifex et conditor Deus.37 Accede ad montem Sion, ad civitatem Dei viventis, Jerusalem cœlestem, ad multorum millium angelorum frequentiam, ad ecclesiam primitivorum, qui conscripti sunt in cœlis, ad judicem omnium Deum, cui nunc servias cum metu et reverentia, quoniam maledictus homo qui facit opus Altissimi negligenter.3839

Hæc est urbs sacra Jerusalem, de qua cecinit Isaias propheta: Surge, illuminare, Jerusalem, quoniam venit lumen tuum, et gloria Domini super te orta est, et in te videbitur gloria ejus; non audietur ultra iniquitas in terra tua, vastitas et contritio in terminis tuis, et occupabit salus muros tuos, et portas tuas laudatio.40 Insanit Judæus infelix, qui ista exponit de terrena Jerusalem quam in adventu sui Messiæ exspectat, quem scimus venisse; quia præfatis verbis gloriosus flos Prophetarum Isaias subjungit: Non erit tibi amplius sol ad lucendum per diem, nec splendor lunæ illuminabit te, sed erit tibi Dominus in lucem sempiternam, et Deus tuus in gloriam tuam; non occidet ultra sol tuus, et luna tua non imminuetur, quia erit tibi Dominus in lucem sempiternam;41 populus autem tuus omnes justi, in perpetuum hereditabunt terram, germen plantationis meæ, opus manus meæ ad glorificandum. Hæc est civitas de qua Joannes apostolus in Apocalypsi mystice loquitur: Erat structura muri ejus ex lapide jaspide, ipsa vero civitas aurum mundum simile vitro mundo; fundamenta muri civitatis omni lapide pretioso ornata, et singulæ portæ ejus ex singulis margaritis, et plateæ civitatis aurum mundum tanquam vitrum pellucidum. Et templum non vidi in ea: Dominus enim Deus omnipotens templum illius est, et Agnus. Et civitas non eget sole neque luna:42 nam claritas Dei illuminat eam, et lucerna ejus est Agnus.43 Non intrabit in illam aliquid coinquinatum et faciens abominationem et mendacium, nisi qui scripti sunt in libro vitæ.

Ad hanc gloriosissimam civitatem indesinenter adspira, o anima. Certe funes ceciderunt tibi in præclaris.44 Sit ergo tibi præcara hæc civitas atque hereditas tua : cujus amore contemne carnalia et terrena. Ps. cxli, 6. Portio tua in terra viventium; ibi thesaurus tuus, ibi propria sunt, gloriosissima, incomparabilia ac ineffabilia bona, quæ facilius potes mereri ac adipisci, quam in vita hac comprehendere aut effari. Ecce adventum tuum præstolatur tota politia tam summæ ac speciosissimæ civitatis : imo Rex et Dominus ejus exspectat te, qui te tanto jucundius, tanto benignius celeriusque suscipiet, quanto in ejus amore perfectior fueris, et quo plura et graviora pro eo pertuleris. Ideo in adversis quasi in omnibus divitiis glorieris.

Usquequo, o misera anima, quamdiu marcescis ignavia, nec acceleras ad intrandum45 terram hanc optimam, in qua nullius rei penuria est, quam tibi Filius suo sanguine comparavit, in qua montes stillant dulcedinem, et colles fluunt lac et mel ?46

Quid tu sopore deprimeris?47 Surge, et invoca Deum tuum, ut deducat te per vias rectas, et ostendat tibi regnum suum, et tribuat tibi scientiam ac salutem Sanctorum.48

Si compateris Christo, et conregnabis; si socia fueris tribulationis, socia eris49

II Cor. i, 7. consolationis. Ibi fluminis impetus, id est copiosissima infusio divitiarum Spiritus Sancti, lætificat civitatem Dei. Videmus nunc Deum per speculum in ænigmate, tunc autem videbimus eum facie ad faciem.5051 Nunc cognoscimus Deum ex parte et imperfecte, tunc vero cognoscemus eum perfecte et clare, sicut cogniti sumus a Deo. Reposita sit hæc spes in sinu tuo, et crede videre bona Domini in terra viventium;5253 atque in ejus dilectione assidue profice, qui tam magnifice egit tecum.

Footnotes

  1. Luc. XI, 10. ↩

  2. Luc. XVIII, 1. ↩

  3. Joann. IV, 24. ↩

  4. Matth. VI, 6. ↩

  5. Matth. IX, 31. ↩

  6. Matth. VII, 21. ↩

  7. Jacob. I, 2. ↩

  8. Jacob. I, 2-4. ↩

  9. Act. XIV, 21. ↩

  10. Apoc. III, 19. ↩

  11. II Tim. III, 12. ↩

  12. Luc. XXIV, 26. ↩

  13. Luc. VI, 25. ↩

  14. Matth. V, 5; ↩

  15. Job XXIV, 12. Judith VIII, 27. ↩

  16. I Petr. IV, 13, 14. ↩

  17. I Petr. 1, 6, 7. ↩

  18. Job xii, 29. ↩

  19. I Petr. 1, 3, 4, 6. ↩

  20. Is. lx, 5. ↩

  21. Is. lxI, 10. ↩

  22. Ps. xv, 10. ↩

  23. Luc. 1, 47, 49. ↩

  24. Soph. III, 14, 15. ↩

  25. Zach. 11, 10. ↩

  26. Ps. cxxi, 1. ↩

  27. II Cor. v, 1. ↩

  28. II Cor. iv, 17. ↩

  29. Ps. xxvi, 14. ↩

  30. I Cor. xv, 58. ↩

  31. Eccle. ix, 10. ↩

  32. Luc. vi, 38. ↩

  33. Sap. iii, 15. ↩

  34. II Par. xv, 7. ↩

  35. Hebr. xiii, 14. ↩

  36. Ps. lxxxvi, 3, 7. ↩

  37. Hebr. xi, 10. ↩

  38. Jer. xli, viii, 10. ↩

  39. Hebr. xii, 22, 23, 28. ↩

  40. Is. lx, 1, 2, 18. ↩

  41. Ibid. 19-21 ↩

  42. I Joann. 11, 15. ↩

  43. Apoc. xxi, 18, 19, 21-23, 27. ↩

  44. Ps. xv, 6. ↩

  45. Josue xviii, 3. ↩

  46. Joel iii, 18. ↩

  47. Jonæ i, 6. ↩

  48. Sap. x, 10. ↩

  49. Rom. viii, 17. ↩

  50. I Cor. xiii, 12. ↩

  51. Ps. xlv, 5. ↩

  52. Ps. xxvi, 13. ↩

  53. Job xix, 27. ↩

Chapter 68 of 70