Articulus 28

Cum quanta diligentia, integritate ac fidelitate observanda sint divina præcepta; et quod non prodest custodire unum sine adimpletione aliorum.

QUANTO prælatus aut princeps in sæculo isto majoris est dignitatis, potestatis ac eminentiæ, tanto cum ampliori diligentia ac promptitudine ei servire ac obedire oportet. Rursus, quo aliquis sapientior sanctiorque consistit, tanto plus amandus venerandusque exstat. Nonne ergo cum summa et maxima diligentia, cum præcordiali amore et incomparabili reverentia, imo cum omni puritate, fidelitate et perseverantia, servire ac obedire oportet Regi regum, Principi universorum, Deo altissimo, qui infinitæ est dignitatis, qui vere omnipotens est, qui omnibus incomparabiliter eminet, cujus sapientiæ non est numerus, cujus sanctitatis et gloriæ nullus est finis?¹ Hinc merito ait Jeremias propheta:² Maledictus homo qui facit opus Dei negligenter. Et Paulus apostolus loquitur:³ Serviamus Deo cum metu et reverentia.⁴ Unde et Salomon monet: Omni custodia custodi cor tuum, ne scilicet in aliquo Deum offendas. Hoc est quod sanctus Moyses jubet: Custodi temetipsum et animam tuam sollicite, et ne obliviscaris verborum Domini Dei tui, et ne excidant de corde tuo cunctis diebus vitæ tuæ.⁵

Denique quam diligenter ac indesinenter debeat quilibet Christianus cogitare et recogitare, intueri ac ponderare divina præcepta, docet sanctus Moyses, dicens: Erunt verba Domini in corde tuo, et narrabis ea filiis tuis; et meditaberis ea sedens in domo tua, et ambulans in itinere, et dormiens atque consurgens; et ligabis ea quasi signum in manu tua, eruntque et movebuntur inter oculos tuos; scribesque ea in limine, et ostiis domus tuæ affiges ea.⁶ Hinc quoque Deus per Moysen præcepit filiis Israel, ut facerent sibi quatuor fimbrias per quatuor angulos palliorum, ponentes in eis vittas hyacinthinas, quas quum viderent, recordarentur omnium mandatorum Dei, nec sequerentur cogitationes suas et oculos per res varias fornicantes.⁷ Hinc de viro justo ait Propheta, quod in lege Domini sit voluntas ejus, et in lege ejus meditabitur die ac nocte.⁸ Quotidie igitur mandata Dei pensemus ac revolvamus, sollicite impleamus, reverenter ac perseveranter Deo in omnibus obedientes, atque in ejus obsequio nos timorate habentes. Nam et S. Leo Papa profatur: O impudens homo!⁹ millia millium angelorum Deo ministrant, et decies millies centena millia angelorum ei adsistunt, et tu in ejus obsequio sedere præsumis? Non dormientibus provenit regnum cœlorum, nec otio desidiaque torpentibus beatitudo æternitatis promittitur.

Præterea, ad hoc quod homo sit in caritate et gratia Dei, oportet ut universa ejus præcepta adimpleat. Qui enim unum præceptum transgreditur, est in mortali peccato, nec prodest ei ad salutem quod alia præcepta observare videtur. Ideo Jacobus apostolus loquitur : Si quis totam legem impleverit, offendat autem in uno, factus est omnium reus.¹⁰ Idcirco oportet Deo integre deservire ac obedire.

Footnotes

1. Ps. cxlvi, 5. ↩

2. Jer. xlviii, 10. ↩

3. Hebr. xii, 28. ↩

4. Prov. iv, 23. ↩

5. Deut. iv, 9. ↩

6. Deut. vi, 6-9. ↩

7. Num. xv, 38, 39. ↩

8. Ps. i, 2. ↩

9. Dan. vii, 10. ↩

10. Jacob. II, 10. ↩