Propositio 132

Dominus ac Salvator evangelicæ legis dator et institutor, ante recessum suum a sæculo isto per ascensionem in cœlum, septem instituit sacramenta novæ et evangelicæ legis, tanquam septem medicinalia vasa, per quæ virtus, gratia et meritum omnium horum quæ assumpsit, fecit pertulitque pro nobis, applicantur hominibus.

Quod est, quoniam Christus Dominus venit in hunc mundum per humanitatem assumptam, ut genus curaret humanum ab omni labe, infectione et languore culparum, puta peccati originalis et personalis, peccati actualis et habitualis, peccati mortalis ac venialis. Quemadmodum itaque medicus carnalis ac naturalis, accedens ad ægros multos variis ægritudinibus laborantes, secum affert plura medicinalia vasa, in quibus diversa continentur medicamenta variarum ægritudinum curativa; sic medicus ille spiritualis, cœlestis, omnipotens, supersapiens, quem nil latet in carne mortali assumpta, inter homines conversans ante suam passionem instituit septem sacramenta, tanquam medicinalia vasa saluberrimaque unguenta ad omnium vitiorum medelam et curam idonea: in quibus virtus et gratia non solum figuraliter, ut in sacramentis veteris Testamenti, designatur, verum etiam efficaciter atque causaliter, modo admirabili, vix comprehensibili et effabili, continetur. Etenim virtus et meritum passionis Christi est sicut universale remedium contra omne peccatum: quod ad curandum diversa vitia hominum particularia opus est applicari et communicari hominibus per instrumenta varia, proportionata ad producendum distinctos particulares effectus curationum interiorum, ac gratiarum, donorum, virtutum, fructuum, beatitudinum et perfectionum.

Interim, quoniam rationalis creatura ex corporali ac spirituali constat substantia, atque per sensibilia ad spiritualium ac divinorum agnitionem deducitur, Christus sacramenta ista in sensibilibus signis materiisque instituit, in quibus spirituales gratiæ ac virtutes curativæ, conservativæ et præservativæ continentur. — Postremo, quamvis aliqua sacramenta evangelicæ legis ante Salvatoris adventum instituta legantur, ut matrimonium et pœnitentia in lege naturæ; nihilo minus a Christo sunt instituta secundum quod sunt Ecclesiæ sacramenta, gratiæ contentiva, signativa et effectiva. — Postremo sacramenta ista desuper in septenario numero sapientissime sunt statuta : nam et septenario universitas designatur. Hæc autem sacramenta tam pauca, universorum præcedentium sacramentorum virtutes et efficacias continent; septem quoque donis Spiritus Sancti correspondent, et septem, imo universa ejiciunt et expellunt dæmonia, id est peccata mortalia. Primum horum sacramentorum, puta Baptismus, est introeuntium Ecclesiam militantem. Secundum, ut Confirmatio, est præliantium in eadem contra adversarios suæ salutis. Tertium, puta Eucharistia, cibus est atque viaticum utrorumque. Quartum, id est Pœnitentia, est reviviscentium ac resurgentium a peccato. Quintum, videlicet Extrema Unctio, est exeuntium præsens exsilium. Sextum, scilicet Ordo, est ministrantium in Ecclesia ac administrantium aliis ecclesiastica sacramenta. Septimum, est prolificantium ad participandum sacramenta præfata, ut Matrimonium, quo conservantur fideles.