Capitulum 9

Qualiter et nos superbiam superare possimus.

NEQUISSIMUM itaque istum superbiæ laqueum evadere ita poterimus, si in singulis virtutibus in quibus nos processisse senserimus, cum sancto Apostolo dixerimus:¹ Non ego, sed gratia Dei mecum;² et, Gratia Dei sum id quod sum; et quod iterum ait: Deus est qui operatur in nobis et velle et perficere pro bona voluntate (nam et auctor nostræ salutis testatur:³ Qui manet in me, et ego in illo, hic fert fructum multum; quia sine me nihil potestis facere);⁴ cum Psalmista quoque dixerimus: Nisi Dominus ædificaverit domum, in vanum laboraverunt qui ædificant eam; nisi Dominus custodierit civitatem, frustra vigilat qui custodit eam; et, Vanum est vobis ante lucem surgere.⁵ Unde Apostolus: Non est, inquit, volentis neque currentis, sed miserentis Dei.⁶