Articulus 29

De auctoritate et potestate generalis seu provincialis Ministri personarum de tertia Regula facientium tria vota.

SICUT ex præhabitis patet, in Regula tertii Ordinis, prout primo a S. Francisco est instituta, atque a summo pontifice Nicolao IV in forma redacta ac confirmata, non fit formalis mentio de generali Ministro, sed de Visitatore qui alicujus sit Ordinis.¹ Sed in apostolicæ Sedis indulto ac bulla in qua concessum est personis tertii Ordinis facere tria vota, et generalibus uti ac gaudere religiosorum privilegiis, inter cetera continetur: Omnes et singuli Fratres prædicti unum presbyterum, utputa dicti Ordinis sui professorem, in eorum generalem Ministrum habeant, qui ipsos Fratres per se, vel per alium aut alios ad id per eum deputandum aut deputandos, visitare, et quibuscumque dicti Ordinis personis in omnibus, præterquam apostolicæ Sedi reservatis casibus, debitam absolutionem impendere possit, necnon quoscumque dictum Ordinem profiteri volentes recipere possit; et ei omnes perpetuo obedire teneantur. Et nullus recipiatur ad habitum et observantiam ac Ordinis ipsius professionem, nec receptus promoveatur, sine expresso consensu generalis Ministri: cui omnes et singuli, etiam sub observantia non viventes, habeant obedire; qui inobedientes et delinquentes Fratres juxta excessuum aut criminum eorum exigentiam possit corrigere, incarcerare ac punire, eosque et eorum domus et loca visitare et reformare. Qui generalis Minister, seu deputatus vel deputati ab eo aut majori parte ipsorum Fratrum, habeant plenariam potestatem quæcumque justa et honesta ac religioni suæ convenientia statuendi ac ordinandi; et omnis generalis Minister possit dispensare in abstinentiis et jejuniis, austeritatibus ceterisque observantiis Regulæ, ex legitima causa, quum viderit expedire.

Hæc et alia quædam habentur in bulla præfata. Quæ et consonant his quæ in principali Regula S. Francisci habentur, ubi inter cetera dicitur: Solis provincialibus Ministris conceditur licentia recipiendi Fratres; et iterum: Universi Fratres tenentur semper habere generalem Ministrum.