Capitulum 1

De verbis contentis in forma salutationum Epistolarum B. Pauli.

(a) PAULUS, servus Jesu Christi, vocatus apostolus : (b) non ab hominibus neque per hominem, sed per Jesum Christum et Deum Patrem ; (c) secundum imperium Dei Salvatoris nostri, et Christi Jesu ; (d) per voluntatem Dei, secundum promissionem vitæ quæ est in Christo Jesu ; (e) secundum fidem electorum Dei, et agnitionem veritatis, quæ secundum pietatem est in spem vitæ æternæ : quam promisit qui non mentitur Deus, ante tempora sæcularia; manifestavit autem temporibus suis verbum suum in prædicatione, quæ credita est mihi secundum præceptum Salvatoris nostri Dei. (f) Segregatus in Evangelium Dei, quod ante promiserat per Prophetas suos in Scripturis sanctis de Filio suo : qui factus est ei ex semine David secundum carnem; qui prædestinatus est Filius Dei in virtute, secundum Spiritum sanctificationis, ex resurrectione mortuorum Jesu Christi Domini nostri ; per quem accepimus gratiam et apostolatum ad obediendum fidei in omnibus gen tibus, pro nomine ejus.¹ (g) Sanctificatis in Christo Jesu, vocatis sanctis, cum omnibus qui invocant nomen Domini nostri Jesu Christi in omni loco ipsorum, et nostro, (h) et fidelibus omnibus, (i) gratia vobis et pax a Deo Patre nostro, et Domino Jesu Christo.