Articulus 38

1. An Christus debuerit nasci de matre desponsata. 2. Utrum inter Mariam et Joseph matrimonium verum fuerit.

1. BENE insuper decuit Christum de Virgine et desponsata generari :¹ primo, propter ipsum Christum, ne scilicet tanquam illegitime natus ab incredulis abjiceretur; secundo, ut ejus generatio solito modo Scripturæ per viros texeretur; tertio, ut ejus adventus lateret diabolum, secundum Ignatium;² quarto, ut haberet nutricium, qui pauper et tanquam colonus venire elegit. Item, ex parte Matris hoc decuit : primo, ne velut adultera lapidaretur; secundo, ne diffamaretur; tertio, ut ei vir deserviret. Item, ex parte nostri : nam per testimonium Joseph certior facta est virginitas sanctæ Matris; secundo, per hoc designatur Ecclesia, quæ est virgo desponsata Christo. Potuit autem diabolus, si permissus a Deo fuisset, per suam naturalem industriam cognovisse quod Mater Christi exstitit virgo; sed non erat permissus experiri hoc ipsum.

2. Denique duplex ponitur perfectio matrimonii, scilicet : prima, consistens in indivisibili conjunctione animorum, per quam unus conjugum semper tenetur alteri fidem servare. Et hæc est matrimonii forma. Et quantum ad hanc perfectionem, perfectum et verum erat matrimonium Mariæ et Joseph. Perfectio autem secunda matrimonii est proles generanda et educanda. Et quoad hoc prædictum matrimonium non fuit consummatum et plenum, nisi quantum ad prolis educationem.