Caput VI. De triplici levamine contra triplicem dolorem.

Alii dolent ex inflictione contritionis, et vulneris, alii ex languore infirmitatis, alii ex defatigatione tribulationis et laboris. Inflictio vulneris commissio criminis. Languor infirmitatis defectus virtutis. Defatigatio laboris, taedium exspectationis, surgens ex multitudine tribulationis et impatienti desiderio promissae retributionis. Ex his sane omnibus dolor surgit, animumque nominis multipliciter affligit. Sed contra triplicem dolorem habes triplicem olei spem. Si itaque doles ex vulnere criminisque commissione, habes oleum propositae veniae ex Domini utique promissione. Si doles ex infirmitate, et defectio virtutis tenuit te, habes oleum promissae gratiae. Si doles fatigatus afflictione, inungere oleo laetitiae in spe promissae gratiae. Si itaque poenitentiae dolor affligit cor tuum, et te urget acerbius conscientia peccatorum, accipe unctionem, et recipe consolationem. Ad illam namque Dominicam vocem (imo divinae unctionis effusionem). Vivo ego, dicit Dominus Deus, nolo mortem impii, sed ut convertatur impius a via sua, et vivat. Convertimini autem a viis vestris pessimis, et quare moriemini domus Israel (Ezech. XXXIII). Quae, quaeso, tam immanis est cujuscunque contritionis poenitentiaeque amaritudo, quam lenire non possit hujusmodi divinae unctionis infusio? Si doles de languore et defectu tuo, insiste precibus, nec prius desistas donec induaris virtute ab alto, donec quiescas penitusque convalescas ab omni dolore vel languore tuo, utpote delibutus pretiosissimo illo evangelicae hydriae unguento: Si enim nostis, inquit, cum sitis mali bona data dare filiis vestris, quanto magis pater vester coelestis dabit spiritum bonum petentibus se? (Luc. XI). Sed ut amplius mireris, in nostra relinquitur potestate ab eo qui dat, et non improperat, ut quivis quantum voluerit tollat, cum dicat: Omnis enim qui petit accipit, et qui quaerit invenit, et pulsanti aperietur (Matth. VIII). Noli itaque parcus esse in expendendo, nec avarus in erogando. Quanto magis erogas, tanto amplius abundas: Gratis, inquit, accepistis, gratis date (Matth. X). Nescit sane gratiae effusio, oleique hujusmodi emanatio in viduae manibus cessare, nisi cum vasa vacua defuerint, quae possit implere. Si in tribulationibus deficis, nimiove labore fatigaris, habes gloriae unctionem, unde fatigationis tuae dolorem lenire possis, cum ab illo pretioso unguentario accipis quod audis: Non sunt condignae passiones hujus temporis ad futuram gloriam quae revelabitur in nobis (Rom. VIII): id enim quod in poenitenti est momentaneum, et leve tribulationis nostrae supra modum in sublimitate aeternum gloriae pondus operatur in nobis (II Cor. IV). Audi adhuc ejusmodi unguentarium eamdem olei speciem gloriaeque unctionem proferentem: Cum enim, inquit, Christus apparuerit, vita vestra, tunc et vos apparebitis cum ipso in gloria (Coloss. I).