Caput XX. Quod oportet, si fieri posset, hanc materiam semper prae oculis habere, et in ejus admirationem jugi occupatione animos suspendere.

RICH. Sed jam tempus est diu protracto sermoni finem imponere, nisi forte occurrit quod super his amplius velis interrogare HUGO. Non occurrit, fateor, quod ultra jam quaerere debeam, nisi forte ad manum habetis quod juxta mysticam intelligentiam recte intelligi possit, de cibo nostri Emmanuelis. RICH. Studeremus et in hoc tuae satisfacere voluntati, nisi timeremus nimiae prolixitatis argui ab his qui student brevitati. HUGO. O quam frustra timemus circa illam materiam studiorum nostrorum moras impendere, quam semper oporteret si fieri posset prae oculis habere, et in ejus admirationem jugi occupatione animos suspendere! RICH. Verissimum procul dubio constat quod dicis, etiam facimus quod vis, et primum videamus de comestione butyri et mellis.