III. Vanden invlote der graciën Gods in onsen gheeste

Ute deser enicheit, daer die gheest verenicht is sonder middel met Gode, hier ute vloyt gracie en̄ alle gaven. Ute deser selver enicheit, daer die gheest rast boven hem selven in God, soe sprect Christus, die ewighe waerheit: ‘Siet, die brudegom comt; gaet ute, hem te ontmoetene¹.’ Christus, die dat licht der ewigher waerheit is, hi sprect: Siet, want overmits hem werden wi siende; want hi is dat licht des Vader, en̄ sonder hem en is gheen licht in hemel noch in erde. Dit spreken Christi in ons, en is anders niet dan een invloyen sijns lichts en̄ sijnre gracien. Dese gracie valt in ons in die enicheit onser overster crachten en̄ ons gheests, daer die hoechste crachte ute vloyen werkelike in allen doegheden, overmits cracht der gracien, ende weder inkeren in dat selve in bande van minnen².

In deser enicheit leghet de macht, en̄ beghin, en̄ einde alles creatuerlijes wercs natuerlike ende overnatuerlike, alsoe verre alst ghewracht wert creatuerliker wijs, overmits gracie, en̄ godlike gaven, ende eyghene macht der creaturen. Ende daer omme gheeft God sine gracie in die enicheit der overster crachten, op dat die mensche altoes doghede werke overmits cracht, en̄ rijcheit, en̄ driven der gracien; want hi gheeft gracie omme werken, en̄ hem selven, boven alle gracie, om gebruken en̄ om rasten. Enicheit ons gheests dat is onse woninghe in godliken vrede en̄ in rijcheit der caritaten; en̄ alle menichfoldicheit der doghede sluten hem daer en̄ leven in die eenvoldicheit des gheests³. Nu is die gracie Gods, die uut Gode vloyt, een inwendich driven ofte jaghen des heylichs Gheests die onsen gheest drivet van binnen en̄ stoect in allen dogheden. Dese gracie vloyt van binnen, niet van buten, want God is ons inwendigher dan wi ons selven sijn, en̄ sijn inwendich driven ofte werken in ons, natuerlike of overnatuerlike, es ons naerre en̄ ynnigher dan ons eyghen werken: en̄ daer omme werct God in ons van binnen uutweert, en̄ alle creaturen van buten inweert. En̄ hier omme comt gracie en̄ alle godlike gaven, en̄ Gods inspreken van binnen in enicheit ons Gheests, niet van buten inder fantasien met sinliken beelden.