IV. Hoe wi ynnicheit fonderen selen in onverbeelder vriheit

Nu sprect dan Christus gheestelike inden toeghekeerden mensce: Siet. Drie poente, alsc ic voirseide, maken den mensche siende in ynnigher oefeninghen. Dat ierste is dat inlichten der gracien Gods. Die gracie Gods inder siclen, is ghclije der keersen inder lanteernen ofte in enen ghelasenen vate¹; want si verlicht, ende verclaert, en̄ doerscijnt dat vat, dat es den goeden mensche. En̄ si openbaert hare den mensche diese binnen heeft, op dat² hi innich is in merkene hem selven. En̄ si openbaert hare oec anderen menschen, dore hem, in dogheden en̄ in goeden exemplen. Die inblic der gracien Gods³ roert en̄ beweghet den mensce inwendich van binnen haestelike, en̄ dat snelle beweghen is dat ierste poent dat ons siende maket. Ute desen snellen beweghene Gods, comt dat ander poent van smenschen weghen, dat es ene vergaderinghe alle der crachten van binnen en̄ van buten, in enicheit des gheestes, in bande van minnen. Dat derde poent es vriheit, dat hem die mensche inkeren moghe, onverbeelt en̄ onghehindert, alsoe dicke alse hi wilt en̄ hem sijns Gods ghedinet. Dat es dat de mensche ontcommert si van lieve en̄ van leede, van ghewinne en̄ van verliese, van verheffene en̄ van verdruckene, van vremder sorghen, van vrouden en̄ van vresen, en̄ onghevaen si van allen creaturen. Desc ·iij· poente maken den mensche siende in inwendigher oefeninghen. Hebdi dese ·iij· poente, soe hebdi een fondament en̄ een beghin ynniger oefeninghen ende ynnichs levens⁴.