V. Van drierhande toecomst ons Heren inden ynnighen mensche

Al waren die oghen claer en̄ dat ghesichte subtijl, en daedt die minlike ghelostighe voirworp¹, dat claer sien en ghenoeghede noch en vorderde niet ofte luttel. En̄ hier omme toent Christus den verclaerden verstendighen oghen, wat si sien selen, dat is² die inwendighe toecomst Christi haers brudegoms³.

Drie manieren van sonderlingher toecomst Gods vintmen inden menschen die hem met devocien oefenen in inwendighen levene; en̄ elke toecomst van drien hoghet den mensche in enen hogheren wesene en̄ in ynnighere oefeninghe.

Die ierste toecomst Christi in ynnigher oefeninghen, die drivet en̄ jaghet den mensche ghevoellic van binnen, en̄ si trect den mensche met alle den crachten opwaert te hemele, ende eyscht hem enicheit te hebbene met Gode. Dit driven en̄ dit trecken ghevoelt men in dat herte, en̄ in die enicheit alle der lijfliker crachte, en̄ sonderlinghe inder begheerliker cracht⁴. Want dese toecomst roert en̄ weret in dat nederste deel des menschen, want dat moet te male ghesuvert, en̄ gheciert, en̄ ontfunct werden en̄ in ghetrocken. Dit driven Gods van binnen, het gheeft, het nemt, het maect rike en̄ arm, weeldich en̄ onweeldich; het doet hopen en̄ onthopen; het maect hitte en̄ coude. Die gaven en̄ die werke die hier in gheseien, in contrarien, die sijn onsegghelie enigher tonghen.

Dese toecomst, met der oefeninghen, deilt hare in ·iiij· wisen, die ene hoghere dan die andere, alsoe wi namaels toenen selen. En̄ hier met wert gheciert dat nederste deel smenschen in ynnighen levene.

Footnotes

1. Sur. nisi sit objectum amabile gratum et jucundum. ↩

2. Versta, namelyk of te weten. Sur. zegt videlieet, enz. ↩

3. L en M, met Surius voegen by: En̄ dit toent hi, daer hi seit: Sponsus venit, die brudegom coemt. ↩

4. in vi concupiscibili, zegt Surius. ↩