VI. Vander ander toecomst ons Heren inden ynnighen mensche

Die andere maniere der inwendigher toecomst Christi in hoghere edelheit en̄ ghelijcheit sijns selfs, en̄ in meerren gaven en̄ claerheden, dat is een invloyen in die hoechste cracht der sielen met rijcheden van Godliken gaven, die stadighen en̄ verclaren en̄ maken den gheest rike in menigher wijs. Dit vloyen Gods in ons eyscht een ute vloyen en̄ ene wedervloyen met alle der rijcheit inden selven gronde daer dat vloyen ute comt¹. In desen vloyene gheeft God en̄ toent groet wonder; maer hi eyscht der sielen alle sine gaven weder, ghemenichfuldicht boven al dat creature gheleysten mach. Dese oefeninghe en̄ dit wesen² es edelre en̄ gheliker Gode dan dat ierste; en̄ hier met werden gheciert die drie overste crachte der sielen.