IX. Vander enicheit des herten

Ute deser hitten comt enicheit des herten, want wi en moghen niet ghewarighe enicheit vercrighen, en si dat die gheest Gods sijn vier ontfuncke in onser herten. Want dat vier maect één en̄ sijn ghelijc, in alle die dinc diet verweldigen en̄ overformen mach.

Enicheit is, dat hem die mensche ghevoelt vergadert van binnen met allen sinen crachten in enicheit sijns herten. Enicheit maect inwendighen vrede en̄ raste van herten. Enicheit des herten es een bant die te gadere trect en̄ omveet¹ lijf en̄ siele, herte en̄ sin, en̄ alle die crachte van buten en̄ van binnen in enicheden van minnen.