XL. Hoe die mensche die ghestedecht is ute sal gaen in vier manieren

Nu sal de mensche, ghestadicht in bande van minnen, wonende bliven in enicheit sijns gheests; en̄ hi sal ute gaen met verlichter redenen en̄ met overvloedigher caritaten in hemel en̄ in erde, en̄ merken alle dinc met claerre besceedenheit, en̄ gheven alle dinc ute gherechter miltheit en̄ ute godliker rijcheit.

In vier wisen wert dese verclaerde mensche gheëyscht en̄ gheneycht uut te gane. Die ierste wise is te Gode en̄ tote allen heylighen; die andere wise es ten sondaren en̄ te allen verkeerden menschen; dat derde ute gaen es inden vagheviere; en̄ dat vierde is tote hem selven en̄ tote allen goeden menscen.