L. Een ghelikenisse hoe God die siele besit ende beweghet natuerlike ende overnatuerlike

Nu merct, een ghelikenisse willic u toenen hier ane. God heeft ghescapen den oversten hemel, ene pure eenvoldighe claerheit ommeringhende en̄ ommegaende alle hemele, en̄ al dat God ye lijflijc en̄ materilic ghesciep; want hi is ene uutwendighe woninghe en̄ een rike Gods en̄ sijnre heylighen, vervult met glorien en̄ met ewigher vrouden. Want nu dese hemel es ene onvermingde claerheit, soe en is hier tijt, noch stat, noch beroeringhe, noch nemmermeer verwande- linghe; want hi is ghestadicht en̄ onwandelbaer boven alle dinc. Die naeste sphere des invierichs hemels, heet die ierste beroeringhe¹. Hier onsprinct alle beweghinghe uten oversten hemele, overmits die cracht Gods. Uut desen beweghene loept dat firmament omme en̄ alle die planeten. En̄ hier af leven en̄ wassen alle creaturen, elke in hare cunne². Nu verstaet, alsoe ghelikerwijs is dat wesen der sielen een gheestelic rike Gods, vervult met godliker claerheit, onthoghende allen onsen crachten, het en si eenvoldigher wijs, dies ic nu zwighen wille³. Siet, onder dit wesen der sielen daer God in regneert, hout hare die enicheit ons gheests rechte alse die ierste beweghinghe, want in deser enicheit wert de gheest beweecht van boven inder cracht Gods, natuerlike en overnatuerlike; want wi en hebben van ons selven niet inder naturen noch boven nature. En̄ dit beweghen Gods, alst overnatuerlic es, dan eest die ierste principale sake⁴ alre doeghede; en̄ inden beweghene Gods werden ghegeven, selken verlichten menschen, die ·vij· gaven dies heylichs Gheests, rechte alse ·vij· planeten, die verclaren en̄ vruchtbaer maken al smenschen leven. Dit es die wise hoe God besit die weselike enicheit ons gheests alse sijn rike; ende hoe hi werket en̄ ute vloyende es met gaven in onse moghelike enicheit⁵ ende in al onse crachte.