LXI. Vander visitatiën Gods ende ons gheests in enicheiden ende in ghelijcheiden

Nu siet God die woninghe ende die raste ane, die hi met ons en̄ in ons ghemaect hevet, dat es die enicheit en̄ die ghelijcheit. Ende die enicheit wilt hi visenteren, sonder onderlaet, met nuwer toecomst sire hogher gheboert¹, ende met riken vloyen sire grondeloser minnen, want hi wilt in weelden wonen in die minnende gheeste. En̄ die ghelijcheit ons gheests wilt hi visiteren met riken gaven, op dat wi gheliker en̄ claerre werden in dogheden. Nu wilt Christus dat wi in die weselike enicheit ons gheests wonen en bliven, rike met hem boven alle creatuerlike were ende boven alle doghede; en̄ dat wi werkelic inder selver enicheit bliven, rike en̄ vervult met dogheden en̄ met hemelschen gaven. En̄ hi wilt dat wi die enicheit en̄ die ghelijcheit visenteren sonder onderlaet, met yeghenwelken werke dat wi werken: want in elken nuwen nu², wert God in ons gheboren; en̄ ute diere hogher gheboert, soo vloyt die heylighe Gheest met allen sinen gaven. Nu selen wi di gaven Gods ontmoeten met ghelijcheden, en̄ die hoghe gheboert in enicheden³.