LVI. Hoe wi gheestelike Gode ontmoeten selen met middele ende sonder middel

Nu hebbic u ghetoent hoe die vrie verhavene mensche, overmits die gracie Gods, siende wert in ynnigher oefeninghen. En̄ dat is dat ierste punt dat wi merken, dat Christus van ons eyscht en̄ begheert in dien dat hi spreet: ‘Siet.’ Dat ander poent en̄ dat derde daer hi sprect: ‘Die brudegom comt, Gaet ute,’ daer hebbic u bewijst ·iij· manieren van inwendigher toecomst Christi. En̄ dat die ierste toecomst hevet ·iiij· wisen, en̄ hoe wie ute selen gaen met oefeninghen, na alre wijs dat ons God van binnen in sire toecomst ontfunct, leret en̄ beweghet. Nu behoret ons te merkene dat vierde punt en̄ dat leste. Dat is dat ontmoet Christi ons brudegoms. Want alle onse inwendighe gheestelike sien in gracien ofte in glorien, en̄ al onse doghelike ute gaen, in wat oefeninghe dat si, dat is al om een ontmoet en̄ een verenighen in Christo onsen brudegom, want hi is onse ewighe raste, ende einde, en̄ loen al ons arbeits.

Ghi wet wel, dat al ontmoet is ene vergaderinghe van tween personen, die comen van diversen staden die in hem selven contrarie sijn ende ghedeilt. Nu comt Christus van boven alse een here, en̄ een milde ghevere die al vermach. En̄ wi comen van beneden alse arme knechte, van ons selven niet vermoghende, maer alles behoevende. Christus comt in ons van binnen uteweert; en̄ wi comen tote hem van buten inwaert: en̄ hier omme moet hier ghescien een gheestelic ontmoet. En̄ dit comen en̄ dit ontmoeten van ons en̄ van Christo is in tween manieren: dat is met middele en̄ sonder middel.