LXXI. Van drien wisen der innichster oefeninghen

Dit ynnichste leven wert gheoefent in drien manieren. Bi wilen keert hem die ynnighe mensce in eenvoldichlike nader ghebrukeliker gheneichtheit, boven alle werkelicheit en̄ boven alle doeghede, met enen eenvoldighen insiene in ghebrukeliker minnen¹. En̄ hier ontmoet hy Gode sonder middel. En̄ uter enicheit Gods scijnt in hem een eenvoldich licht, en̄ dit licht toent hem duysternisse, bloetheit, ende niet. Inder duysternissen wert hi omvaen, en̄ valt in onwisen alse in een verdoelen. Inder bloetheit verliest hi ghemerc en̄ ondersceet van allen dinghen, en̄ wert overformt en̄ dore gaen mit cenvoldigher claerheit. Inden niete faelgiert hi al sijns werkes; want inden werkene der grondeloser minnen Gods wert hi verwonnen; ende inder ghebrukeliker neyghinghen sijns gheests, verwint hi Gode, en̄ wert een gheest met hem. En̄ in deser verenichtheit inden gheeste Gods comt hi in enen ghebrukeliken smaec, en̄ besit dat godlike wesen. En̄ hi wert vervult, nader ontsonkenheit sijns selfs in sinen weseliken sine², met der afgrondigher weelden en̄ rijcheit Gods. En̄ ute deser rijcheit vloyt, in die enicheit der overster crachte, een omvanc en̄ ene volheit van ghevoelliker minnen. En̄ ute deser volheit ghevoelliker minnen, vloyt in dat herte en̄ in die lijflike crachte een ghenoechlic doregaende smaec. En̄ overmits dese vloede, wert de mensche onbeweghelic van binnen, en̄ sijns selfs ommachtich en̄ al sijns werkes. Ende hi en weet niet noch en ghevoelt niet anders in dat ynnichste sijns gronts, in siele en̄ in lijf, dan ene sonderlinghe claerheit met ghevoelliker welheit en̄ doregaende smake. Dit is die ierste wise die ledich es; want si ledicht den mensche van allen dinghen, ende si verheftene boven werken ende boven alle doghede. En̄ si enicht den mensce met Gode, en̄ maect ene vaste ghestadicheit der ynnichster oefeninghen dier men pleghen mach. Soe wanncer den goeden mensche enighe onlede ofte enighe oefeninghe der doeghede vermiddelen ofte verbeelden mach des bloets inkeers, alse hijs begheert³: soe wert hi ghehindert in deser wisen, want dese wise es een overgaen alle dine⁴ in ere ledicheit. Aldus hebdi die ierste maniere der ynnichster oefeninghen.