LI. Vanden ellefsten artikele ons gheloves

Die ellefste steen hiet Onichinus, ende hier inne stont Joseph, die ellefste sone her Jacobs. Met desen stene verstaen wi dat ellefste artikel, ende met den name Joseph sinte Thadeuse, dat es Judas Zelotes, ons Heren apostel. Want Joseph ludet alsoe vele in dietsche alse een toedoen¹, ochte eene vermeerringhe², ochte die gherecht ghemaect es den Here³. Ende dit leert ons al sinte Thadeus in desen ellefsten artikele, daer hi sprect: ‘Ic gheloeve die opversten- nisse des vleeschs.’ Hier sal werden toeghedaen die lichame toe der zielen; ende hier af sal wassen in ons ene vermeerringhe der vrouden; ende alsoe werden wi gherecht ghemaect den Here, alse wi hem dienen ende loven eweleke, met al dien dat wi van heme ontfaen hebben, dat es ziele ende lijf. Ende alsoe ghelike wi den edelen stene die onichinus hetet, die ene vermingde varuwe heeft, dat es wit ende roet. Ende hi es dorscinech, alse eens menschen naghel, ende hi wast in Indien. Ende hier omme en es hi niet ghelijc in alre wijs den anderen, daer ic u vore ave seide, die stonden in dat scoudercleet, ende die wassen in Arabien. Ende dese van Indien hebben ene viereghe ghedaente, ende si sijn omvaen met witten ringhen. Met desen stene verstaen wi die gloriose menschen na den lesten ordele, want si selen sijn dorscinech, wit, ende claer alse de sonne, overmids puerheit der consciencien: met roeder varuwen gheminct, want si ghecruset hebben hare vleesch in den wederstane haerre voeleker ghelost. Ende noch ene sonderlinghe rode varuwe sele wi hebben van den bloede Christi, daer wi alle in ghewasschen sijn. Ende hier omme mote wi nu wassen in Indien; want Indie ludet alsoe vele alse een verlichtende voreganc⁴, dat es ·j· heilech leven, dat moet vore gaen. Ende soe sele wi noch hebben ene ghedaente van viere, dat es inwindege berrende minne, die ons te male dore gaen sal; ende wi selen omvaen sijn met witten ringhen, dat es met allen dien vrien keren⁵, die wi Gode gheoffert hebben. Die vriheit sal ons omvaen ende voeren in Gode, ende weder in ons, ende voert in alle heileghen, na alle die maniere van salecheiden, die wi met vrien werken verdient hebben. Maer wille wi hier toe comen, soe mote wi den apostel gheliken, die dit artikel set in onsen gheloeve. Ende die heeft drie namen na edelheit sijns levens, dat es Thadeus, Judas, Zelotes. Judas ludet alse vele alse beliende⁶, ende glorificerende: ende hier omme sele wi Gode belien ende glorificeren in worden ende in werken. Wi selen oec sijn Zelotes, dat es een berrende minnere, die mint met ghevoeleker herten. Ende hier mede werden wi Thadeus, dat es begripende den prince⁷, ende een begrijp des princen⁸. Ende dit sal ons beide ghescien: alse wi Christum den edelen prince begripen, soe werden wi sijn begrijp, ende in desen tween geleghet onse salecheit.