LVII. Vander heilegher olien der salvinghen

Hier na seldi horen hoe Moyses Aaronne ende sine sonen consacreerde, priestere te sine in der joetscher wet. Ende in den iersten mote wi merken hoe die olie ghemaect was, daer si mede ghesalft ende ghehelecht worden. Onse Here sprac tote Moysesse aldus: ‘Ghi selt nemen wale riekende crude specien, der ierster ende der ute vercorenster mirren¹, vifhondert siclen.’ Ghi selt weten dat elke cikle, in den ghewichte des heilechdoems, ene once² bediet, ende aldus warent vifhondert oncen mirren. Ende hi sprect voert: ‘Ghi selt nemen cinamomen half alsoe vele, dat es twehondert oncen ende ·l·, ende twehondert oncen ende ·l· calami, ende vifhondert oncen cassien. Ende ghi selt nemen olie van oliven ene mate diemen nuemt hin, dat es een sister; ende aldus seldi maken die heileghe olie der salvinghen. Dese salve sal te gadere ghevuecht sijn met den werke eens speciers³; ende hier mede seldi salven dat tabernakel des ghetuuchs, ende die arke des testaments, ende die tafele met haren vaten, ende dien candelare met alle dien dat heme toe behoert, den outaer der wale riekender crude, ende den outaer der sacrificien, ende al dat te haerre beider ufeninghen toe behoret. Alle dese dinghe seldi heilech maken, ende si selen sijn heilech der heileghen⁴: diese gherijnt⁵, hi sal gheheilecht werden. Aaronne ende sine sonen die seldi salven ende heilech maken, op dat si mi dienen moghen in priesterscape. Ende ghi selt segghen den kinderen, dat es den volke van Israel: Dese olie der salvinghen die sal mi sijn heilech in uwe gheslechten. Ende gheens menschen vleesch en sal hier mede niet ghesalft sijn. Ende na die composicie deser salven en seldi ghene andre maken⁶, want si es gheheilecht, ende si sal u heilech sijn. Soe wat mensche⁷ al selke salve maect, ende daer ave gheeft enen vremde, hi sal verdreven werden van sinen volke⁸.’

Siet, dit was die heileghe olie der salvinghen, die God Moysesse gheboet te makene, daer die priestere der Joden mede ghesalft worden ende gheheilecht, na wise der ouder wet. Ende dese olie was ene figure der heileghen olien, die Christus selve maecte, ende die eweleke duren sal, daer hi ons allen mede ghesalft heeft in den heileghen Gheeste, ende sunderlinghe die priesteren der neuwer wet, in eenre sunderlingher wijs, boven andere menschen.