LXII. Vander olien van olive

Hier toe woude onse Here hebben olie van olive boemen. Die olive boem heet Olea, die vrocht olive, dat sap dat ute der vrocht vloeit, dat es olie. Met den olive boeme verstaen wi den Vader in der Godheit; met sire vrocht sinen Sone, onsen Here Jhesum Christum, God ende mensce; met der olien die me der vrocht vloeit, soe verstaen wi die minne ende die genade der godheit ende der menscheit. Want die olive boem heet in der Scrifturen een edel vorenemende boem die vrede betekent¹; want die Vader gaf ons sinen Sone alse ene vrocht des eweghen vreden; ende die Sone, overmids den heileghen Gheest, soe gaf hi heme selven in die perse der Joden, alsoe dat hi vloeide van heilegher olien, die ons allen heilech ende salech maken mach, eest dat wijs begheren.

Nu meret hoe die waerheit concordeert met der figuren². Doen Moyses die confectie der heilegher salven maken soude, doen nam hi die risere van dien ·iiij· spesiboemen, met ghewichte alsoe alst heme God gheboet³, dat was vifhondert oncen mirren, ende ·v· hondert oncen cassien, ende half alsoe vele calamus ende cinnamomen, dat was van beide dien boemen⁴ vif hondert oncen; want van roke ende van crachte soe sijn dese twe boeme alsoe vele edelre ende starkere in der confectien. Ende hier toe nam hi olie van oliven ene mate dienren noemt hin, dat es te minsten ·j· sister, ende te meesten soe eest ·vj· sister, dat es twelef pont, want elc sister doet twe pont⁵. Ende na die meerre mate soe nam Moyses die olie⁶, ende in dese olie leide hi alle die risere, alsoe langhe, dat die olie eracht ende roke ontfinc van dien riseren. Ende daer na perste men ute met crachte alle die versceit der risere ende der olien⁷: ende dit⁸ was ·j· sacrament in der ouder wet, daer dat tabernakel ende die priesteren mede ghesalft worden ende gheheilecht, na wise der ouder wet ende der figuren. Dat ghewichte der risere, daer men die salve ave maecte, dat was ·xv· hondert oncen, ende elke tweleve oncen maecten ·j· pont: ende alsoe waest hondert pont ende ·xxv·, ende ·xij· pont olien van olivien. Ghi hebt vore wel ghehoert dat hondert pont ende twintech die swaerste waghe es in den heilechdoeme; want alsoe swaer was die candelare⁹. Maer dit ghewichte moet noch ·v· pont swaerre sijn, sonder die olie; ende dire was oec ·xij· pont.